4. janúar - Spánn lét Marokkó eftir stjórn útlendunnar Ifni.
5. janúar - Ariana Afghan Airlines flug 701 hrapaði á hús í aðflugi að Heathrow í London með þeim afleiðingum að 50 farþegar og tveir íbúar hússins létust.
5. janúar - Sovéska geimkönnunarfarið Venera 5 hóf ferð sína til Venus.
16. janúar - Sojús 5 lagðist að Sojús 4 og tveir geimfarar fluttu sig yfir, sem var í fyrsta sinn sem það var gert.
16. janúar - Háskólaneminn Jan Palach kveikti í sér á Venseslástorgi í Prag til að mótmæla innrás Sovétmanna í Tékkóslóvakíu. Hann lést af sárum sínum þremur dögum síðar.
26. janúar - Elvis Presley tók upp lagið „Long Black Limousine“ í stúdíóí í Memphis, sem var fyrsta lagið í röð endurkomulaga sem komu út á plötunum From Elvis in Memphis og Back in Memphis.
27. janúar - 14 menn, þar af 9 gyðingar, voru teknir af lífi í Bagdad fyrir að hafa njósnað fyrir Ísrael.
27. janúar - Mótmælendapresturinn og sambandssinninn Ian Paisley var handtekinn og fangelsaður í þrjá mánuði fyrir að hafa staðið fyrir ólöglegri samkomu.
28. janúar - Olíulekinn í Santa Barbara 1969: 80-100.000 tunnur af olíu runnu út í sjó við Santa Barbara í Kaliforníu. Atvikið varð öldungadeildarþingmanninum Gaylord Nelson innblástur að fyrsta Degi jarðar árið 1970.
3. júní - Á heræfingu á vegum SEATO sigldi ástralska flugmóðurskipið HMAS Melbourne (R21) á bandaríska tundurspillinn USS Frank E. Evans í Suður-Kínahafi með þeim afleiðingum að 74 bandarískir sjóliðar létust.
8. júní - Francisco Franco fyrirskipaði lokun landamæranna að Gíbraltar vegna þjóðaratkvæðagreiðslu um fullveldi hjálendunnar. Landamærin voru lokuð til 1982.
8. júní - Bandaríkjaforseti, Richard Nixon, og forseti Suður-Víetnam, Nguyễn Văn Thiệu, hittust á Midway-eyju þar sem Nixon tilkynnti um brotthvarf 25.000 bandarískra hermanna frá Víetnam.
5. júlí - Þróunarráðherra Keníu, Tom Mboya, var myrtur sem leiddi til uppþota í helstu borgum landsins.
8. júlí - Víetnamstríðið: Bandaríkjaher hóf brottflutning herliðs frá Suður-Víetnam.
10. júlí - Þríbytna Donald Crowhurst, Teignmouth Electron, fannst á reki í miðju Atlantshafi. Talið er að Crowhurst hafi framið sjálfsmorð með því að stökkva fyrir borð.
8. ágúst - Nokkrar sprengjur sprungu um borð í lestum á Ítalíu með þeim afleiðingum að 12 særðust. Þær reyndust síðar hafa verið á vegum hægriöfgasamtakanna Ordine Nuovo.
5. október - Fyrsti þáttur Monty Python's Flying Circus fór í loftið á sjónvarpsstöðinni BBC1.
9. október - Dagar reiði: Þjóðvarðliðið í Illinois var kallað saman vegna mótmæla með þátttöku Weather Underground í Chicago vegna réttarhalda yfir áttmenningunum frá Chicago.
15. október - Þúsundir tóku þátt í mótmælum gegn Víetnamstríðinu víðs vegar um Bandaríkin undir yfirskriftinni Frestur til að ljúka stríðinu í Víetnam.
17. nóvember - Málverki eftir Caravaggio, Fæðing Jesú með dýrlingunum Lárentíusi og Frans, var rænt úr kirkju í Palermó, líklega af sikileysku mafíunni.
20. október - Fyrstu rannsóknarniðurstöður sem sýndu að róteindir væru samsettar úr minni eindum, kvörkum, voru birtar.
6. desember - Meredith Hunter var myrt af öryggisvörðum á rokkhátíðinni Altamont Free Concert sem Rolling Stones stóðu fyrir í Kaliforníu.
12. desember - Blóðbaðið á Piazza Fontana: 17 létust og 88 slösuðust þegar sprengja sprakk í höfuðstöðvum Banca Nazionale dell'Agricoltura í Mílanó. Tvær sprengjur í viðbót sprungu í Róm hálftíma síðar.
15. desember - Tveir anarkistar, Pietro Valpreda og Giuseppe Pinelli, voru handteknir og sakaðir um sprengingarnar í Róm. Pinelli féll út um glugga á lögreglustöðinni og lést, sem varð Dario Fo innblástur að leikritinu Stjórnleysingi ferst af slysförum.