ZE
|
Quésta pàgina a l'é scrîta in léngoa zenéize
A Grafîa adeuviâ a l'é quélla de l'Académia Ligùstica do Brénno |
Sagep | |
---|---|
Stâto | Itàlia |
Fórma de socjêtæ | Socjêtæ a responsabilitæ limitâ |
Fondaçión | 12 de lùggio do 1956 a Zêna |
Sêde prinçipâ | Zêna |
Grùppo | Grafiche G7 s.a.s. |
Persónn-e ciâve | Bruno Guzzo (prescidénte) |
Setô | Editoriâle |
Faturòu | 1.058.991 €[1] (2022) |
Ùtile nétto | 3.617 €[1] (2022) |
Dipendénti | 8[1] (2022) |
Scîto web | www.sagep.it |
A Sagep (sìgla ch'a veu dî Società Arti Grafiche e Pubblicità, ofiçialménte Sagep Editori s.r.l.) a l'é 'na câza editôa zenéize, specializâ in scê àrte e a coltûa ligùstica, ch'a l'à a sò sêde into Palàçio Zórzo Döia in Ciàssa de Sàn Matê, into sestê do Meu[2].
A Sagep a l'é stæta fondâ da-o Romano Acquarone, da l'Eugenio De Andreis e da-o Filippo Peschiera a-i 12 de lùggio do 1965. Aprêuvo a l'abandón da socjêtæ da pàrte do Peschêa e a mòrte de l'Acquarón into 1982, o De Andreis co-a fìggia Alessandra o l'à gestîo da lê l'inpréiza scìnn-a-i ànni novànta do sécolo XX. Inta primavéia do 2006 gh'é stæto 'na diciaraçión de faliménto ma, into méntre, a Sagep a l'é stæta acatâ da l'inprenditô Stefano Vablais, ch'o l'à decîzo de andâ avànti co-e publicaçioìn de pónta de l'inpréiza, sàiva a dî e goìdde turìstiche, tra e ciù avoxæ into mercòu locâle, comensàndo a publicâne in de âtre léngoe ascì[3].
A Sagep a l'é de lóngo specializâ inta publicaçión de sàggi in scê matêie ligùstiche, ch'én stæte o sogètto de bén bén de scrîti (cómme a colànn-a Guide turistiche e d'arte), co-în'atençión particolâ in sciâ stöia, l'architetûa, l'anbiénte, e tradiçioìn e a cuxìnn-a lìgure, prezentàndo in ciâve de aprofondiménto ànche di ànbiti diferénti de l'antropologîa colturâle da naçión lìgure. Tra e colànn-e dedicæ a-a Ligùria gh'é, in particolâ, Liguria in parole povere, SAGEP e Genova, Genova città inaspettata, Liguria regione inaspettata, Weekend, Storie di Liguria, Scrittori di Liguria, Genova e la musica e i Manuali Sagep[4].
Tra i tèsti ciù avoxæ se peu aregordâ 'n'inportànte monografîa in sciô Françésco Toresàn, fìggio de l'Andrîa (sêuxo de l'Àldo Manùnçio) e, insémme a-o sò fræ Federîgo, diretô da ciù famôza stanpàia inta stöia de l'editorîa[5]. Tra i lìbbri ch'àn avûo ciù sucèsso gh'é ancón, prezénpio, La pittura a Genova e in Liguria, a Descrizione della città di Genova da un anonimo del 1818 e a Guida Sagep di Genova, ch'a l'à registròu ciù de trexentomîa còpie vendûe[4].
Inte l'ànno 2003 a Sagep a l'à colaboròu co-o Muzêo de Sant'Agostìn inta realizaçión de 'na mòstra de fotografîe ch'a fâva védde l'evoluçión edilìçia da çitæ dêuviàndo l'archìvio fotogràfico de l'editô[6]. Pe de ciù, a câza editôa a cûa 'na revìsta, ciamâ pròpio Archivio, dónde l'é publicòu ògni tréi méixi 'na pàrte de st'arecugéita chi[4]. A Sagep a l'à stanpòu ascì de bèlle òpere ch'én stæte promòsse da aministraçioìn ò énti pùblichi, cómme o volùmme pe-i çìnquant'ànni do Salón nàotico de Zêna[7][8].
Tra o 1984 e o 1990, a Sagep a l'é stæta tra i editoî ch'àn publicòu a revìsta, scrîta in léngoa ingléize e in italiàn, Architettura spazio e società, ch'a sciortîva ògni tréi méixi. Tra e âtre publicaçioìn periòdiche stanpæ da-a câza editôa zenéize se peu ancón aregordâ l'Indice per i beni culturali del territorio ligure, pò-u perîodo 1976-1982[4].
A-a giornâ d'ancheu, dòppo l'intrâ into 2012 drénto a-o grùppo Gràfiche G7, a Sagep a stànpa ciù de novànta publicaçioìn a l'ànno[9].
Contròllo de outoritæ | VIAF (EN) 215145003311361301116 · WorldCat Identities (EN) 215145003311361301116 |
---|