ZE
|
Quésta pàgina a l'é scrîta in léngoa zenéize
A Grafîa adeuviâ a l'é quélla de l'Académia Ligùstica do Brénno |
Il melangolo | |
---|---|
Stâto | Itàlia |
Fórma de socjêtæ | Socjêtæ a responsabilitæ limitâ |
Fondaçión | 1976 a Zêna |
Creâ da | Carlo Angelino Elio Gioanola |
Sêde prinçipâ | Zêna |
Persónn-e ciâve | Francangelo Scapolla (prescidénte) Simone Regazzoni (diretô editoriâle) Debora Paparella (diretô comerciâle) |
Setô | Editoriâle |
Faturòu | 144.829 €[1] (2021) |
Ùtile nétto | -2.668 €[1] (2021) |
Dipendénti | 3[1] (2021) |
Scîto web | ilmelangolo.com |
Il melangolo (ofiçialménte Il nuovo melangolo) a l'é 'na câza editôa zenéize ch'a l'à a sò sêde inta Stràdda de Pòrta Soprànn-a, into sestê do Meu[2].
A câza editôa a l'é stæta fondâ into 1976[3] da-o Carlo Angelino[4] e da l'Elio Gioanola, di profesoî a-o dipartiménto de filozofîa[5] de l'Universcitæ de Zêna chi gh'àn dæto da sùbito 'n indirìsso editoriâle bén bén caraterizòu, insémme a tréi studénti: l'Adolfo Beverini, o Vittorio Bo e o Renato Sartoris[6]. O nómme çernûo pi-â socjêtæ o vêgne da quéllo, prinçipalménte leterâio, di çetroìn amâi, in particolâ minsonæ da l'Eugenio Montale inta sò Elegia di Pico Farnese[7].
Into 1989 i fondatoî do Melangolo àn çedûo a l'Einaudi o 51% de partecipaçioìn, co-a câza editôa ch'a l'é coscì anæta aprêuvo a-i fæti de quélla socjêtæ, intrâ pöco dòppo into grùppo Elemond[8]. A ògni mòddo za into 1996 i doî sòcci fondatoî restæ inte l'inpréiza, l'Angelino e o Sartoris, àn tórna acatòu a quöta ch'àivan çedûo e Elemond, con l'agiùtto de 'na dêxénn-a de amîxi cómme o Roberto Cerati, ecs diretô comerciâle de l'Einaudi, o Francangelo Scapolla, stanpòu con Microart's e editô con Le Mani, e o Francesco Casà, 'n ecs manager ch'o l'àiva pigiòu a càrega de diretô editoriâle. A câza editôa, coscì ricostitoîa, a l'é stæta pertànto rinominâ o Nuovo Melangolo[7].
Il melangolo o cûa a publicaçión de sàzzi in sce vàrie matêie, cómme filozofîa, antopologîa, antighìstica e letiatûa, a ògni mòddo co-ina fórte specializaçión in sciâ filozofîa[9]. Dæto ch'o l'à publicòu, de média, ciù de 10 volùmmi a l'ànno, inta clascificaçión de l'ISTAT o vên conscideròu cómme 'n editô de grandéssa média[10].
Tra i lìbbri de sucésso publichæ da-a câza editôa se pêuan aregordâ e Lezioni di Heidegger e Il concetto di Dio dopo Auschwitz de l'Hans Jonas e Conde e Le voci do Claudio Magris. A produçión editoriâle a l'é articolâ in sce vàrie colànn-e, co-e sêi ciù inportànti chi són: Nugae, arecugéita de lìbbri da portâ inta stàcca, Lecturae, formâ da òpere crìtiche e leterâie, Opuscola, dedicâ a-a filozofîa, Opera, ch'a l'arechéugge de lóngo òpere filozòfiche ma pò-u ciù contenporànie, Kum!, òpere do penscêo eoropêo d'ancheu repigiæ da-o festival de Ancónn-a co-o mæximo nómme, e a Filosofia della formazione, dedicâ a sta disciplìnn-a chi[6][11]. Gh'é ascì 'na colànn-a dedicâ a têmi ò outoî ligùstichi, ciamâ Melangolo Genova[12].
Pe de ciù, Il melangolo o cûa a publicaçión de dôe revìste de lóngo de filozofîa, sàiva a dî Eldos, dirètta da l'Angelino, e Estetica, dirètta da-o Massimo Cacciari, tùtte dôe a cadénsa semestrâle[6].
Contròllo de outoritæ | VIAF (EN) 159476515 · LCCN (EN) n82212311 · WorldCat Identities (EN) n82-212311 |
---|