ZE
|
Quésta pàgina a l'é scrîta in léngoa zenéize
A Grafîa adeuviâ a l'é quélla de l'Académia Ligùstica do Brénno |
Fratelli Frilli Editori | |
---|---|
Stâto | Itàlia |
Fórma de socjêtæ | Socjêtæ a responsabilitæ limitâ |
Fondaçión | 2000 a Zêna |
Creâ da | Carlo e Giacomo Frilli |
Sêde prinçipâ | Zêna |
Persónn-e ciâve | Carlo Frilli (prescidénte) |
Setô | Editoriâle |
Faturòu | 354.705 €[1] (2021) |
Ùtile nétto | 728 €[1] (2021) |
Dipendénti | 2[1] (2021) |
Scîto web | shop.frillieditori.com/index.php? |
Fratelli Frilli Editori (Fræ Frìlli Editoî in zenéize) a l'é 'na câza editôa zenéize ch'a l'à a sò sêde inta Stràdda Priaróggia, into quartê de Quàrto a-o Mâ[2].
A câza editôa, fondâ inte l'ànno 2000[3], a l'à comensòu a sò ativitæ co-a publicaçión de doî lìbbri de denónçia: o romànzo Il Sindaco. L'avventura politica di un medico do Paolo Cornaglia Ferraris, mêgo di figeu avoxòu e diretô pe vint'ànni do Gaslîni ch'o l'àiva za scrîto di sàzzi de denónçia in sciô móndo da sanitæ, e La Mala-Ricetta, òpera de 'n informatô sénsa nómme dónd'o vên denonçiòu o scistêma dêuviòu da-e indùstrie di reméddi pi-â difuxón di sò prodûti.
Sùbito dòppo i fæti do G8 de Zêna do 2001, a câza editôa a l'à fîto publicòu Le quattro giornate di Genova, òpera curâ da-o Raffaello Bisso e o Claudio Marradi, ch'a l'à avûo 'n gràn sucésso editoriâle portàndo a fà conósce a Fratelli Frilli inte 'n mercòu bén bén ciù làrgo[3], con vàrie mençioìn in sce di giornâli da-a grànde difuxón[4][5][6].
Inte quélli ànni l'é stæto pöi inouguròu a colànn-a Tascabili Noir, in prinçìpio con òpere de scritoî mascimaménte lìguri[7] e ch'a l'à dæto 'n decîzo indirìsso a-a câza editôa vèrso a publicaçión de òpere noir. Inte sta colànn-a chi, che d'ancheu a gh'à ciù de 200 tìtoli, gh'àn fæto o sò debû editoriâle vàrri outoî, tra i quæ se pêuan aregordâ o Bruno Morchio, a Maria Masella, l'Antonio Caron, a Rosa Cerrato, a Maria Teresa Valle e o Roberto Centazzo[3]. Inti ànni a vegnî a Fratelli Frilli a l'à inougoròu de colànn-e in sce di âtri argoménti ascì, da-e goìdde a-e publicaçioìn fotogràfiche e i sàzzi, tra i quæ gh'é 'na colànn-a stòrica ch'a l'inclùdde e nêuve ediçioìn di inportànti scrîti de stöia lìgure, cómme i anâli do Càfaro e di sò continoatoî, óltre a monografîe dedichæ a vàrri argoménti e personàggi cómme l'Andrîa Döia e o Benéito Zacàia[8].
D'ancheu, co-ina média de ciù de 50 publicaçioìn a l'ànno[9], segóndo a clasificaçión de l'ISTAT a Fratelli Frilli a l'é da consciderâ tra e câze editôe de livéllo médio-âto[10].
Contròllo de outoritæ | VIAF (EN) 132724227 · LCCN (EN) n2003037065 · WorldCat Identities (EN) n2003-037065 |
---|