Roma: Lu Prisidenti dâ Ripùbbrica taliana, Giorgiu Napulitanu, parra ô pòpulu talianu cû sò missaggiu nurmali di fini annu, dâ sò risidenza dû Quirinali.
Gaza: L'esercitu israilianu trasìu ntô tirritoriu palistinisi. Li bummiati cuntinuanu, e puru na para di scoli gistiti di l'ONU foru bummiati. Lu nùmmuru di morti acchianau a chiossai di 500.
Ginevra: (Ansa) Lu Cunsigghiu dî diritti umani di l'Onu appruva na risuluzzioni ca cunnanna cu forza l'uffinsiva militaru di Israeli a Gaza, ma ntantu la mattanza cuntinua.
Nàpuli: lu capu dâ cosca dî casalisi fu arristatu. L'autru jornu avìa rinisciutu a scapparasilla, pigghiannu na gallirìa dî fugnaturi. Setola, accussì si chiama lu camurrista arristatu, era unu dî 30 òmini cchiù ricircati.
New York: Nu aèriu partutu dâ metropuli miricana, appi a attirrari ntô ciumi Hudson a causa pari di nu mpattu cu ucedda survaggi. Tutti li 155 pirsuni a bordu si pôttiru sarvari grazzî â maistrìa dû pilota.
Gaza: Li surdati d'Israeli làssanu la Striscia di Gaza (intra dumani si nn'avìssiru a gh'iri cumpritamenti); ê spaddi si làssanu chiossai di 1.300 morti (400 di ss'ammazzati su' picciriddi) e 5.000 firiti. Li dui parti ca si fìciru la guerra dìciunu, ognidunu d'iddi, ca vinceru: cui ni chianci li cunsiquenzi è pirò la pupulazzioni, na massa di puvireddi ca vulìssiru campari macari iddi, comu è disidèriu di ogni cristianu, cu tranquillitati e dignitati.
Mèrica: Barack Obama scigghìu la tilivisioni àrabba Al-Arabiya pri mannàricci a diri ê mussurmani ca "li miricani non sunnu li nimichi d'iddi"; dissi macari ca iddu stissu criscìu nti l'Indunesia, nu paisi fattu cchiossai di mussurmani; appoi cci aripitìu di mpignàrisi pri ggh'iri quantu prima nta na capitali di nu granni paisi mussurmanu. Nta tutta la ntirvista tilivisiva, Obama desi a capiri ca voli ripigghiari a parrari, ca voli abbissari quantu vinni spasciatu nta ott'anni d'amministrazzioni Bush.
Lampidusa: Lu Cunsigghiu cumunali di Lampidusa appruvau cû votu di tutti, senza nudda ccizzioni, la muzzioni unni addumanna ô prisidenti dû Cunsigghiu Silviu Berlusconi lu licenziamentu dû ministru di lu nternu Robertu Maroni. Na muzzioni appruvata cu l'appràusu ginirali nta na cunvucazzioni straurdinària dû Cunsigghiu cumunali fatta fora a l'apertu, ntâ chiazza dû Municìpiu.
Milanu: Murìu a sta sira, ntâ sò casa di Milanu, Minu Reitanu, c'avìa ancora 64 anni. Lu cantanti, d'urìggini calabbrisi di Sciumara 'i Muru, era malatu di quarchi tempu.
Calàbbria: Pô malu tempu e pi tutta l'acqua di celu c'hà cascatu ntâ Calàbbria, ammeri è quattru di sta notti, nu pezzu dâ muntagna ca c'è supra a Trupea sciddicau nzinu ô mari. Pi furtuna non ci foru morti, ma quarchi 60 chilòmitri di l'autustrata foru chiuruti ê màchini. N'àutra frana, succiduta duminicadìa passata, sempri ntâ Calàbbria, agghiri ô svìnculu di l'autustrata Roglianu-Grimàudu, fici dui morti e tri firiti.