Roma: Ntô cuntinenti cuntinuanu a accapitari casi di razzisìmu e uramai vuliri dìciri ca sunnu casi isulati, voli dìciri èssiri orbi e surdi. A Roma, ntê matinati, tri carusazzi cci dèsiru a focu a un puvireddu, nu citatinu innianu ca, comu a tanti àutri pòviri cristi, durmìa a la stazzioni firroviarìa di Nittunu (Roma) e ora chistu è ô spitali, 'n prògnusi arisirvata. Li tri, citatini taliani, ca foru firmati dê Carrabbinera, dìciunu ca vulìanu finiri la siratina cu "n'azzioni eclatanti, pi pruvari na forti emuzzioni"
Catania: Accumincia aoggi la festa di Sant'Àita e cuntìnua pi dumani e passannu-dumani.Tutti l’anni dô 3 o 5 di frivaru, pi tri jorna Catania si scorda tutti li cosi e tutti l’affanni e si cuncentra sulu pi la festa a Sant’Àita : î cannalori, àuti e granni ciri di lignu ntagghiati, ‘n prucissioni furianu pi tutti li strati; si vìdunu cintinara di migghiara di cristiani ca vènunu di tutti li gnuni, luminara nta tutti li strati, tutti li chiesi vènunu nciùrati, e appoi li fochi ô chianu e la vara di Sant'Àita ca veni purtata ‘n prucissioni pi la cità.
Udini: (Ansa) Murìu Eluana Englaro. La nutìzzia vinni cunfirmata a Udini di funti di l'amministrazzioni cumunali e riggiunali e dî forzi di l'òrdini.
Australia: L’Australia sud-urientali cuntìnua a abbruciari. Lu focu si spannìu nti tri Stati dû sud-est, Victoria, Novu Galles dû Sud e lu turritòriu di Canberra, pô càudu c'hà fattu uramai di chiossai di na simana (s'hà agghicatu macari a 48° C.) e pô ventu forti ca fà sbambari lu focu. Nzinu a ora hannu murutu quarchi 171 cristiani.
Lampidusa: Lu centru di pirmanenza timpurania fu tiatru di na manifestazzioni dî prutesta di clannisitini uspitati ntô centru, chi bruciaru puru matirassi e àutri cosi, ô puntu chi la polizzia appi a ntirnviniri. Ci foru puru diversi dicini di firiti.