Nandrin (li minme e francès), c' est ene comene rebanêye del Walonreye, el province di Lidje.
Tour di Nandrin: rimetowe a noû e 1976, c' est çou ki dmeure do vî tchesta do 14inme eyet 18inme siekes.
Le priyeuré astalé chal va esse di l' mambornance di Cluny disk' å cmince do 16inme sieke.
E 1312, cwand l' ôre est dissout, les béns del kimandreye passèt-st ås tchvalîs d' l' ôre di Sint-Djhan d' Djeruzalem. Come les administreus sont bén lon (å pus sovint i viként-st a Paris), li cmandreye toume a bokets, eyet å moumint del Revolucion Francesse i gn a pus k' des rwenes.
Enute, on pout co vey deus tours, li meur d' eclôse, les cmons -- k' ont divnou des lodjmints d' on dominne privé, après k' il euxhîxhe sitî èn otel-restorant d' lucse -- eyet l' eglijhe fondêye e 1260 avou bråmint des radjoutaedjes, etur zels on gåliotaedje baroke (fwait dins les anêyes 1760), don do cmandeu d' adon, Laure le Tonnelier de Breteuil.
Dispoy 1994, li Nandrin Rock Festival assaetche, å cmince do moes d' awousse, ene floxhe tchaeke côp pus grande di djins vnant schoûter del muzike rok di cwålité.
Ovide Musin, askepyî sol mwaisse plaece (ki poite asteure si no) e 1854, et ki mora e 1929 a Brooklyn, Noû York. Ci fourit on grand violonisse ki fjha s' cårire e l' Amerike bijhrece, wice k' i fôrma bråmint d' eleves dins l' tradicion del sicole bedje do violon.