Alfabét Latin
|
Galengan basa Indonesia pematang nyaéta taneuh disawah nu ngahaja dijangkungkeun saeutik paragi ngajaga cai sangkan bisa ngeueuman sawah.[1] Galengan ogé bisa jadi wates hiji sawah jeung sawah nu séjénna, naha wates dina harti harta banda atawa wates dina harti pagawéan.[1]Mangsa datang usum panén jeung ngagarap migawé sawah, galengan téh hiji-hijina jalan pikeun liliwatan boh indit anapon balik.[2] Galengan ogé mibanda kagunaan séjén tayalian ngajaga taneuh sawah jeung leutak henteu kabawa palid, balukarna tangtu sawah henteu subur deui.[1]
Mangsa ngagarap sawah pikeun dipelakan deui, galengan pang heulana dipigawé tayalian dipopokan ku leutak sangkan jangkungna henteu ngurangan sarta bisa nahan cai leuwih loba.[3] Nincak usum ngeplang sawah, nuboga atawa nu ngurus sawah getén ngurilingan sawah nempo galengan bisi aya nu totos ku keuyeup.[3] Nincak usum nyaatan galengan mimiti ngajejembrung jukut, ieu meré mangpaat pikeun nu ngarit ngadon ngala jukut parab ingon-ingon.[3] Teu saeutik galengan dimangpaatkeun pikeun pepelakan (tumpang sari), kayaning melak hiris, kacang panjang, jayanti, turi, jeung sajabana.[4]