Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Terbregge is e gehuch en 'n stadswiek vaan de Nederlandse stad Rotterdam. 't Ligk aon de linkerkant vaan 't revierke de Rotte. Terbregge huurt bij 't stadsdeil Hillegersberg en vèlt oeterein in Aajd-Terbregge, de vaan oersprunk lendeleke bebouwing aon de revier, en Nui-Terbregge, 'n nuibouwwiek. In 2012 had 't 3.435 inwoeners.
De naom Terbregge liet ziech verklaore es aon de brögk; de vörm bregge in plaots vaan brugge tuint, wie väöl aw Hollandse dialekte, Ingweoonse oontrunding. 't Geit hei um 'n brögk euver de Rotte, die hei inderdaod ligk. Terbregge, dinkelek in d'n daartienden iew oontstande (in d'n tied vaan de groete oontginninge), veel vaanajds oonder Hillegersberg, meh dewijl Hillegersberg aon de rechterkant vaan de Rotte ligk, vint me Terbregge aon de linkerkant.
In de Vreugmodernen Tied begós me de umgeving vaan Rotterdam te vervene, zoetot de polders oonder water kaome te stoon. Terbregge bestoont daodoor oetindelek oet e paar huiskes aon 'nen diek mèt aon allebei de kante water.[1] Ind negentienden iew woorte die pole weer druuggelag en kós ziech obbenuits landbouw oontwikkele.
Mèt de annexatie vaan Hillegersberg door Rotterdam (in 1941) kaom ouch Terbregge oonder die stad te valle. Veuriers woort hei de umgeving evels nog lendelek gelaote; nuibouw woort allein op d'n aandere Rottekant gerealiseerd. Wel kaom zuielek vaan 't gehuch in 1973 't knouppunt Terbregseplein, boe d'n A16 en d'n A20 ziech rake. In 1999 kaom aon 't aofgelege karakter 'n ind wie de Vinexwiek Nui-Terbregge gebouwd woort. Heimèt is Terbregge gans deil gewore vaan de Rotterdamse stadsbebouwing. Noordelek en oostelek vaan 't aajd gehuch gief 't evels nog 'ne kleine lendeleke buffer.
Rotterdam: Sjtadsdeile, opgelufde gemeintes en dörpsgemeinsjappe |
---|
Centrum (Cool) | Charlois (Heijplaat) | Delfshaven (Oud- en Nieuw-Mathenesse) | Feijenoord (Katendrecht) | Hillegersberg-Schiebroek (Hillegersberg · Schiebroek · Terbregge) | Hoek van Holland | Hoogvliet | IJsselmonde | Kralingen-Crooswijk (Kralingen) | Noord | Overschie | Pernis ('s-Gravenambacht) | Prins Alexander (Kralingse Veer) | Rozenburg (Blankenburg) |