Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Kralingse Veer is e dörp wat es buurt deil oetmaak vaan de gemeinte Rotterdam zoewie vaan häör stadsdeil Prins Alexander. 't Ligk aon 't water, oongeveer bij de moond vaan d'n Hollandsen IJssel in de Nuie Maos. De plaots heet zoe'n 1700 inwoeners. 't Dörpke is geneump nao 't poontveer riechting IJsselmonde wat hei iewelaank voor.
De mieste bebwouing is geconcentreerd aon de IJsselmondselaan, dee vaanoet Kralingen nao de revier löp. 't Opvallendste monumint is de Herstèld Hervörmde Laankerk.
Kralingse Veer huurt bij Rotterdam, meh weurt umgeve door Capels groondgebeed. Neet allein oostelek vaan 't dörp vint me die gemeinte, ouch 't industrieterrein Rivium, direk westelek vaan Kralingse Veer, vèlt dao-oonder.[1] Dit is 't gevolg vaan diverse gemeinteleke herindeilinge (zuug oonder). Kralingse Veer vörmp zoe 'n exclaaf vaan zoewel 't stadsdeil Prins Alexander es de gemeinte Rotterdam.
't Poontveer vaan IJsselmonde nao Kralingen weurt veur 't iers geneump in 1333, meh is woersjijnelek väöl awwer. 't Kin oonderdeil zien gewees vaan 'ne Romeinsen heerweeg, al vèlt dat neet aon te tuine. Umtot 't dörp Kralingen wijer landinwaarts laog, kós hei roond 'nen herberg en 'n oetspanning e gans dörp oontstoon, zeker wie midde achtienden iew de zalmvèsserij op de Hollandse revere opkaom. In Kralingse Veer kaom 'ne zalmaofslaag dee tot in d'n twintegsten iew bestande heet; roond deen tied verdwijnt de zalm oet 't gebeed. Bij de Watersnoedramp vaan 1953 kaom ouch d'n diek bij Kralingse Veer oonder drök te stoon; in 1955 mós 'r daorum verzwoerd weure. Heibij góng väöl vaan de dörpsbebouwing verlore. 't Veer bleef bestoon tot de eupening kortbij vaan de Van Brienenoordbrögk in 1965.
Kralingse Veer had vaanajds ummer oonder Kralingen gevalle.[2] Wie dees gemeinte in 1895 woort opgeluf, kaom 't lendelek deil oonder Capelle aan den IJssel, zoe ouch Kralingse Veer. Rotterdam bleef evels hoongereg nao mie groond, en annexeerde in 1941 deile Capels groondgebeed. De grens kraog heibij häör bove besjreve grèlleg verluip.
Dit artikel is gooddeils gebaseerd op zie Nederlandstaoleg equivalent, en wel in dees versie.
Rotterdam: Sjtadsdeile, opgelufde gemeintes en dörpsgemeinsjappe |
---|
Centrum (Cool) | Charlois (Heijplaat) | Delfshaven (Oud- en Nieuw-Mathenesse) | Feijenoord (Katendrecht) | Hillegersberg-Schiebroek (Hillegersberg · Schiebroek · Terbregge) | Hoek van Holland | Hoogvliet | IJsselmonde | Kralingen-Crooswijk (Kralingen) | Noord | Overschie | Pernis ('s-Gravenambacht) | Prins Alexander (Kralingse Veer) | Rozenburg (Blankenburg) |