Gestio
Populus
Commemoratio
Sigla
Tabula aut despectus
Cechoslovacia[1] sive Bohemoslovacia[2] (Bohemice et Slovace Československo), nominibus politicis Res publica Bohemoslovaca[3] (1920–1960), Res publica Bohemoslovaca socialistica[3] (1960–1990), Res publica Bohemica et Slovaca foederata[4] (1990–1992), imperio Austro-Hungarico everso condita, ab anno 1918[5] usque ad annum 1992 civitas in media Europa fuit, quae Germaniae, Austriae, Poloniae, Hungariae, Ucrainae, Unioni Sovieticae, Dacoromaniae adiacebat; eadem res publica Bohemiam, Moraviam, Silesiam, Slovaciam, Rutheniam Subcarpathaneam continebat. Bohemiam, Moraviam, Silesiam plerumque Bohemi et Theodisci, partim Poloni, Slovaciam Slovaci et Hungari, partim Theodisci, Poloni, Rutheniam Subcarpathaneam Russini et Hungari incolebant. Caput Cechoslovaciae Praga, capita terrarum singularum Praga (Bohemia), Bruna (Moravia et Silesia), Bratislavia sive Posonium (Slovacia), Užhorod (Ruthenia Subcarpathanea) fuerunt.
Bohemoslovacia tamquam res publica unius gentis Bohemoslovace loquentis condita est; utrum haec gens re vera fuerit necne, in dubio est.
Anno 1938, i.e. paulo ante alterum bellum gentium Cechoslovacia secundum foedus Monacense ab gubernatoribus Germaniae, Magnae Britanniae, Franco-Galliae et Italiae factum confinia Bohemica, Silesiaca, Moravica Germaniae et partim Poloniae, confinia deinde Slovaca et Subcarpathanea Hungariae et partim Poloniae concedere coacta est omnesque Cechoslovaciae partes ius sui administrandi acceperunt. Quin etiam anno insequenti Hitlerus, tyrannus Germaniae, minatus effecit, ut Slovaci Rem Publicam Slovacam declararent et Bohemia cum Moravia se sub tutelam Imperii Theodisci dederet; quo facto reliqua pars Bohemiae et Moraviae protectoratus Theodiscus facta est gubernatoresque Cechoslovaci, qui se in exsilium Britannicum iam pridem contulerant, semet ipsi gubernatores Cechoslovaciae occupatae declaraverunt.
Altero bello omnium gentium confecto omnes terrae praeter Rutheniam Subcarpathaneam, quam Unio Sovietica occupavit, rursus in Cechoslovacia coniunctae sunt. Deinde ab anno 1968 usque ad annum 1992 Slovacia et Cechia unam Cechoslovaciam foederalem conformabant, quae anno 1993 divisa est in partes duas, quarum una Slovacia, altera vero Cechia appellatur.
De nomine rei publicae adhuc disputatur, nam e.g. Carolus Egger nomine Tzechoslovaciae usus est; attamen Academia scientiarum huius rei publicae primum "Academia scientiarum Bohemoslovenica", deinde "Academia scientiarum Bohemoslovaca" nuncupabatur. Hoc nomen in usum inductum est, propterea quod vox Slovenica non ad Slovaciam, sed potius ad Sloveniam, illis temporibus partem Iugoslaviae, pertinebat. Praeterea in Lexico Bohemo-Latino anno 1992 edito tres versiones nominis huius rei publicae propositae sunt:
Československo: Bohemoslovenia (forma vetustior), Bohemoslovacia (forma recentior); Tzechoslovac(h)ia (-kia); (nomen officiale) Česká a Slovenská federativní republika Res Publica Bohemica et Slovaca.[6]
československý: Bohemoslovenicus, Bohemoslovacus[6]
Etiam aliae formae nominis huius rei publicae Latinae propositae sunt: Cechoslovacia,[7] Cechoslovakia,[8] Cecoslovachia,[9] Czechoslovakia[10] sive Cechoslovachia.[11]
Civitates |
Albania · Andorra · Armenia · Atropatene · Austria · Belgica · Bosnia et Herzegovina · Britanniarum regnum · Bulgaria · Cechia · Civitas Vaticana · Croatia · Cyprus · Dania · Estonia · Finnia · Francia · Georgia · Germania · Graecia · Helvetia · Hibernia · Hispania · Hungaria · Islandia · Italia · Lettonia · Lichtenstenum · Lituania · Luxemburgum · Macedonia Septentrionalis · Melita · Moldavia · Monoecus · Mons Niger · Nederlandia · Norvegia · Polonia · Portugallia · Romania · Russia · Ruthenia Alba · Serbia · Sanctus Marinus · Slovacia · Slovenia · Suecia · Turcia · Ucraina |
---|---|
Civitates statu dubio |
Abascia · Carabachia Superior · Cyprus septentrionalis · Donetskensis · Kosovia · Luganskensis · Ossetia Meridionalis · Transnistria |
Territoria obnoxia et statu dubio |
Acroterium et Decelea · Caesarea insula · Crimaea · Faeroae · Gibraltaria · Lisia · Riduna · Monapia · Sargia |