Ganet eo Mikael Madeg e Courbevoie (e-kichenik Pariz) d’ar 4 a viz Genver 1950. E dad a oa ganet e Breizh, e Landivizio (ganet e 1922) hag e vamm 'zo ganet e Belgia, dezhi un tad eus Normandi. Kregiñ a reas Mikael Madeg da zeskiñ brezhoneg d'e 17 vloaz, pa oa o chom e Taverny, e bro-Bariz. Heuliet en doa "skol dre lizer" Visant Seite, ha prestik goude'oa aet e-barzh Al Leur Nevez.
Desket en deus ivez kembraeg e Kembre, m'eo bet o chom 'pad daou vloaz, e Bethesda ha Bangor, ha gouezeleg Bro-Skos e Bro-Skos, dreist-holl e Sgitheanach. Gouzout a ra esperanteg ivez. Bet eo bet skoliad en ENS St Cloud hag aet da gelenner saozneg war-lerc'h. Kelennet en deus tri bloavezh e Normandi e-lec'h oa o chom bepred war ar maez, e Loudieg ha neuze oa o chom e Bro-Gwened (Gweltaz), er C'hastellin, ma kelenne brezhoneg, hag erfin saozneg adarre e Brest. Sevenet en deus div zoktorelezh, unan diwar-benn lesanvioù brezhonek Bro-Leon hag eben diwar-benn anvioù kêriadennou Bro-Leon. Abaoe 1983 emañ o chom war ar maez, e Sant-Tounan, e Bro Leon.
Skrivagner
Ouzhpenn e labourioù lennegel niverus (barzhonegoù, met dreist-holl danevelloù ha romantoù) ez eus embannet un toullad eus e oberennoù studi hag enklask diwar-benn al lesanvioù (e Breizh, e Kembre, e Normandi hag e Bro-Skos) ha lec'hanvadurezh Bro-Leon, pe ivez war temoù all: ar bezhin, ar c'hleuzioù, hag an divyezegezh abred, na pa ve ken.
Diwar e genlabour gant Per Pondaven ha Yann Riou ez eus bet embannet tro 20 000 lec'hanv eus Arvor Leon, distagadur, lec'hiadenn hag all: frouezh ugent bloavezh a enklaskoù e-touez an dud.
Anavezet eo bet Mikael Madeg er bloavezhioù dek ha-tri ugent pa oa deuet da Vro-Leon da bourmen e galite emsaver da gentañ, ha diwezhatoc'h da chom da vat. Plijout a ra kalz dezhañ ar brezhoneg ha tik eo gant ar rannyezhoù, dreist-holl. E-kerzh an hañvezh 2006 e oa bet embannet e 100vet oberenn, hag e penn kentañ 2012 ez eus pelloc'h 142 ditl en e "levrlennadur".
Roll levrioù
Setu un nebeud oberennoù gant Mikael Madeg,skrivet pe troet gantañ, pe c'hoazh kensavet gantañ; an darn vrasañ anezho a zo bet embannet gant Emgleo Breiz ha muioc'h mui gant Embann Kêredol, e embannerez .
E brezhoneg
Komz sonskridaweg rannyezou : niverenn skwer euz brezoneg gorre Leon (gant Soazig Grall hag Ivon Gourmelon). Brezhoneg Yezh Vew, 1976 (19 p.)
Leor lesanoiou Leon : goueled Leon ha Bro-Bagan : who's not who, ha piou a zo! Brud Nevez, 1985
Margodig an dour eienenn. Emgleo Breiz - Ar helenner, 1985 (46 p. ; skeudennaouet gant Joël Jim Sevellec)
Desevel bugale e brezoneg - Dosier dastumet ha renket gand Mikael Madeg. Emgleo Breiz - Ar Skol Vrezoneg, 1986 (522 p. ; golo skeudennaouet gant Joël Jim Sevellec)
Studiadenn anoiou lehioù Kastellin. 1986
Ur studiadenn war anoiou lehioù Landerne. 1986 (20 p.)
Yann e vaz-houarn. Emgleo Breiz, 1987 (skeudennaouet gant Joël Jim Sevellec)
Ur lévrad lesanùeu a Vro-Gwened - Tresadenneu ged Reun an Honseg - Lakeet e brehoneg ar vro ged Gilberte Kervareg. Brud Nevez, 1987 (211 p.)
Ar seiz posubl. Brud Nevez, 1987 (175 p.)
(troidigezh diwar Irma Chilton) Ar peroked. An Here, 1987 (Levrioù skol al louarn 1 ; 79 p. ; skeudennaouet)
Barzaz. Emglo Breiz, 1988 (140 p. ; skeudennaouet gant L. Derrien)
Marvaillou. Brud Nevez - Emgleo Breiz, 1990 (43 p. + 41 p. + 36 p. + 33 p. + 35 p.)
Sell a-dreñv war eun oberenn : skrid diwar-benn al lennegez. Brud Nevez - Emgleo Breiz, 1990 (67 p.)
Marvaillou 6 : kleuziad ha kaea : labour ar hleuziou e Bro Leon. Brud Nevez, 1992 (165 p.)
Traité de prononciation du breton du Nord-Ouest, Emgleo Breiz, 2010.
Liesyezhek
Blaz keltieg, blas celtaidd, blas keltek, blas ceilteach, blas celtiagh. A taste of celtic languages, un goût de celtique
Renabl anoiou lehiou inizi kornog Goueled Leon - Inventaire des noms de lieux du domaine maritime de l'archipel Ouessant Molène. Ar Skol Vrezoneg, 1991 (299 p.)
Talus du Léon : kleuziou e Bro-Leon (in"Penn ar Bed")
Surprenants surnoms bretons. Al lesanoiou brezoneg gwella