Die häiligi Susanna vo Rom stirbt – wil si dr Kaiser Maximian nit het wölle hüroote – als chrischtlechi Märtirere(öppen anne 294).
Die römischi Provinz Räzie wird (öppen anne 294) ufdeilt: D Raetia prima isch s Land i den Alpen oben und het dr Zäntraloort Curia Raetorum, s hütige Chur; d Raetia secunda isch s Alpevorland vom Bodesee bis a d Donau abe, mit Augusta Vindelicorum, hüt Augsburg, als Hauptstadt.[1]
Es isch Chrieg zwüsche de Röömer und de Goote, de Markomannen und anderne Völker.
Dr Cassius dio wird Prokonsul vo Afrika.
Im römische Gältsischteem würde nöji Gältsorten ygfüert. dr Argenteus und dr Follis.
Für d Gschicht vo dr Tächnik isch es guet z wüsse, ass men us em Joor 294 s eltischte Fundstück vom ene Rossschue (me säit däm au öppe Hipposandaale) könnt; me het ne i dr römische Villa z Neupotz am Rhy gfunde.
Bi Vitudurum, em hütige Winterthur, boue d Röömer als Elemänt vom nöie Rhy-Iller-Donau-Limes e Feschtig. Das weiss me, wil dr Inschriftschtäi vo dozmol no erhalten isch.[2] Die Inschrift isch im 10. Joorhundert uf Konstanz cho und i dr Chile vrbout worde; sid 1967 isch dr Schtäi wider z Winterthur.[3] Öppis vo de Muure vo däm Kaschtell gseet me no hüt z Oberi.
Is Düütschen übertreit goot d Inschrift eso: «Dr Kaiser Gaius Aurelius Valerius Diocletianus, dr gröscht Germanesyger, dr gröscht Sarmatesyger, dr gröscht Persersyger, elf Joor Tribun, zäämol zum Syger uusgrueffe, s füüfte mol Konsul, Vatter vom Vatterland, Prokonsul, dr fromm, glücklich, sygriich Kaiser, und dr Valerius Constantius und dr Galerius Valerius Maximianus, die edle Underkaiser, hän d Muur vo Vitudurum vo Grund uuf und uf iri Chöschte lo boue under em Aurelius Proculus, em fürnääme Provinzstatthalter, sinere Läitig.»
Öppen i dr glyche Zyt – me cha s aber nid uf s Joor gnau sääge – wird chly südlich vo Vitodurum au s Kaschtell vo Irgehuuse bout; vo dämm könnt me dr antik latynisch Naame nit; es isch drfüür die römischi Feschtig vo dr Schwiiz, wo me hüt no am mäischte gseet.[4][5]
↑Erik Beck, Lukas Clemens: Antike Inschriften während des Mittelalters nördlich der Alpen. Wahrnehmung und Instrumentalisierung. In: Inschriftenkutluren im kommunalen Italien. 2019. S. 293.