S Kastell Iirgehuuse isch e römisches Kastell bi Iirgehuuse i de Gmaind Pfäffike im Kantoo Zöri.

S Kastell lit uf eme chliine Hügel grad öber em Pfäffikersee südlich vo Iirgehuuse a de alte Römerstroos vo Wintertuur uf Chämpraate am Zürisee. S Kastell isch dör de Chaiser Valentinian (364–375) baut wore, wo d Grenze am Rhii verstärche loo het. Früener isch am gliiche Platz e Guetshof gstande.

S Kastell isch recht guet erhalte und messt öppe 60 uf 60 Meter. Es het i jedem Egge e Turm und ussert bi de Ostmuur, wo de Iigang gsii isch, je en Mittelturm.

De antik Name vom Kastell isch nöd öberliferet, doch werd de Ort Iirgehuuse inere Uurchund usem Joor 811 Camputuna sive Irincheshusa gnennt. Drum werd vermuetet, ass s Kastell *Cambodunum ghaisse het. Hüt haisst e Dorf drai Kilometer südlich vom Kastell no Chämte.

 Commons: Kastell Iirgehuuse – Sammlig vo Multimediadateie

• Andreas Zürcher: Irgenhausen. In: Historisches Lexikon vo dr Schwiiz.

• Ernst Meyer: Das römische Kastell Irgenhausen; Basel 1969.