Van Jonge Leu en Oale Groond is ne Tweantse zeepriege, debuteerd in 2005, dee in opdracht van RTV Oost wördn produceerd duur NL Film & TV. De riege hef grote bekeandheid in de regio en ok doarboetn. Een vuurbeeld van de invlood van Van Jonge Leu en Oale Groond is de in 2007 vuur t eerst oetzeundn Limbörgstalige zeepriege De Hemelpaort.
De regie van de eerste riege ofleverings was in haan van Johan Nijenhuis (ofl. 1-4), Steven de Jong, Geert Lautenschutz, Jan van den Nieuwenhuijzen en Jan Albert de Weerd. De verhaallienn warn van Ingrid van den Heuvel. Ut oorsproonkelike skript was vuur n heel deel in t Nederlaands. De vertaling van de dialoogn in t Tweants was biej de eerste riege (30 ofleaveringn) van Herman Finkers, dee zölf ok metspöaln, biej de tweede riege (24) meestparts van Goaitsen van der Vliet en biej de dearde riege (24) van Laurens ten Den. Oondernemmers oet de regio, zooas Grolsch, Bolletje en Wehkamp sponsert de riege.
De eerste ofleavering van zöndag 2 oktober 2005 har 300.000 kiekers. De tweede riege opnaamn bint ofroond in augustus 2006. Inmiddels hebt Omroep Gelderland, RTV Noord-Holland, RTV Utrecht en RTV Noord de riege ok oetzeundn. Vanof 21 mei 2007 wördn de eerste riege ok op Nederlaand 1 oetzeundn. Der is n derde seizoen opnömn in de zommermoandn van 2007; dit seizoen wördn vanof 4 november op RTV Oost oetzeundn. Ne veerde riege is oetzeundn vanof 2 november 2008. In 2009 is de riege veurlopig stopt; meugelk geet t nog wieder in 2010. RTV Oost-heufdredakteur Henny Everts hef dr oawer zegd: "Van Jonge Leu en Oale Groond is nog altijd een goed bekeken en gewaardeerd tv-programma, maar tevens voor RTV Oost een dure en ambitieuze serie om te maken. [...] Sinds de komst van digitale televisie zijn de regionale omroepen op een onmogelijke plek weggestopt. [...] Daarmee zit de zender nauwelijks meer in het zap-rijtje van de kijker."[1]
De ofleaverings kö'j ok bekiekn op de webstea van RTV Oost.
Van de zeepriege is in 2009 ne parodie in mini-ofleaverings maakt dee-t RTV Oost ok oetzeundn hef, Van Domme Leu op Koale Groond.
In de riege dreait t um de familie Wildspieker. Vaar Wildspieker kömp oet de tied en moor Minie steet der op de boerderieje allean vuur. Dochter Fenna besloet um biej de moor in te trekn, in t begin teegn eer zin. Fenna ontdekt woarum zee Tweante in eer jeugd de rugge hef tookeerd. Eer breur Alwie (trouwd met Patricia) hef zoo zien eagn, financiële, probleemn en eer jongere zuster Monkie steet as sportlerares en voetbaltreener nog tusken de jonge leu.
De familie Bode bint noabers van de Wildspiekers. De rieke familie Bode besteet oet vaar Hein, moor Lineke en de tweeling Elvis en Janis. De vriejgezeln breurs Mans en Gerrit Olde Weernink spölt ok ne belangrieke rolle in de riege.