Enondaedje do label «Nosse comene dit oyi» (1î d' måss)
Li fiesse ås lingaedjes walons ava come tinme li scolaedje do walon azès djonnes. Dipus d' 15 pordjets fourît prezintés å mwaisse raploû d' Nameur li 19 di may.
Li bate di noûmots a stî sol voyaedjåjhe (tourisse).
Creyåcions:
Li 1î d' måss, enondaedje do label «Nosse comene dit oyi», avou sinateure po les comenes di Blegné, Chevri-Rance, Derbu, Djerpene, Djeve, Hu, Lidje, Måmdey, Nameur et Tchålerwè.
On rbatijhe ene rowe di Tchålerwè å no da Patrice Loumoumba.
Les Rodjes Diåles wangnèt li ptite finåle (adon rascode li medaye di bronze) al Cope daegnrece di fotbale (c' est l' prumî côp di leu-n istwere. Mins docô après, les discovietes di frawtinaedje dins l' tchampionat d' Beldjike (lomé "fotbelgate" pa Jean Goffart) vént rafroedi les pus fels sopoirteus.
Li solea gåta l' Beldjike; des timperateures teribes di l' esté ont fwait dåner les cinsîs, di cåze d' ene setchresse k' on rmete voltî å reschandixhaedje del Daegne.
E moes d' setimbe, minêye di pesse des pourceas d' Afrike dins les singlés el Gåme. Toplin des payis n' apoirtèt pupont d' tchå d' pourcea d' Beldjike.
Li 2 d' decimbe gn ourit 75.000 djins a s' rashonner a Brussele po on rotaedje disconte li reschandixhaedje del Daegne.
Li 18 di nôvimbe, Charles Michel tape li cote sol håye come prumî minisse del Beldjike, paski l' pårti flamind NVA a cwité l' aloyance di govienmint, a cåze ki l' Beldjike a siné li påye daegnrece so l' bagance.
E l' Espagne, li droetî Mariano Rajoy est disdjoké do posse di prezidint do govienmint (prumî minisse) d' on vôtaedje di mesfiyance e pårlumint, et replaecî på hintchî Pedro Sanchez.
E Mecsike, gn ava dipus d' 34.000 moudes ciste anêye la, on rcôrd. Nouv côps so dijh, li moudreu n' est nén trové, adon, nén pûni.
Les Palestinîs d' Gaza atakèt a roter påjhirmint eviè l' meur di schåyaedje avou Israyel tos les vénrdis dispu l' moes d' måss. I dmandèt l' droet des tchessîs-evoye di 1948 et après di rtrover leu payis. Les sôdårds israyelîs, portant bén a houte dirî l' meur, saetchèt sor zels a côps d' fizik. Et touwer 280 djins, bråmint des djonnes. Mins å pus sovint, i lzî tirnut dins les djambes po ndè fé des stroupyîs a veye (end åreut yeu dipus d' 2000 coixhîs insi).