'n Tour de France 2011 is 'n 98sn Tour uut de geschiedenisse. Uutzounderlik wos dat 'n êestn rit gin proloog wos, mor e geweunn rit die ankwam up de Mont des Alouettes en die ewonn is deur Philippe Gilbert. Belangryke veranderiengn zyn de verdêlienge van de puntn voun de groenn boai en de bolletjes, woadeure dan d'echte sprinters en d'echte klemmers die boais kunn pakkn.
't Dein 22 ploegn mei, doavan woarn der 18 Pro Tourploegn. 4 ploegn begunn met 9 coureurs van 't zeste land: Euskaltel (ollemoale Baskische Spanjoardn), Europcar en Saur-Sojasun (ollemoale Fransmans) en Katjoasja (ollemoale Russn).
Passage du Gois > Mont des Alouettes (Les Herbiers)
De vlucht van 'n dag wos voun Roy, Quemeneur en Westra, mo ze kustn 't nie houdn toet up 't ende. Up 10 kilomeiters van 't ende vieln der e masse coureurs en oundermêer Contador verlôor doadeure mêer of e menute up d'aar favorietn. In e sprint bergup wos 't Cancellara die êest gienk, mo Gilbert remonteerde zounder vele rôoi en won vôorn Evans.
E vlucht met Bouet, Delage, Guttierez, Ruben Perez en Terpstra krêeg 8 menuutn, mor uuteindelik wos 't e massasprint woarin dat Tyler Farrar wonn, 'n êestn Amerikoan die dat ekunn het up Independence Day.
'n Rit endigde up e massasprint, mo de mêeste echte sprinters dein nie mei, buutn Cavendish, die won vôorn Gilbert. Beisn 'n rit woarn der e masse coureurs die vieln (lik Contador), Nicki Sørensen wos omverre ereen deur e motard, die zyn villo oek e hêel ende meislipte.
Vou 'n twiddn dag tereke won 't er e vluchter die won, mo 't wos surtout en incident met en otto van France 2 woarover dat er mêest ekout wos. Dienn otto stak up e verkêerd moment de 5 vluchters vôorn, moeste de boane upschokkn voun nie teegn e boom te vlammn en rêed teegn Flecha, die rechtet viel en doadeure Johnny Hoogerland meitrok, die top over klôotn in 'n stekkerdroad vlôog.
E vlucht me zesse (de Fransche Di Grégorio, Minard, Vichot, El Fares en Delaplace en 'n Italioander Marcato) wos were epakt deur d'achtervolgienge van Omega Pharma-Lotto, die rêedn vou nundern sprinter Greipel. Gilbert sproung nog weg up 't ende, mo 't droei egliek uut up e sprint. Cavendish beguste e tikkeltje te vroeg te sprintn en Greipel kuste nem kloppn en ezo zyn êestn Tourrit winn.
Van e vlucht met zesse blêef Lars Boom 't langste vôorn, mo 't wos uuteindelik egliek e massasprint, 't wos Cavendish die won en nog eki toogde wien dat 'n bestn sprinter van de latste joarn is.
In 'n êestn bergrit in de Pyreneeën begustn de betere te ryen in de latste ofdoalienge vôorn Luz-Ardiden, up 'n Tourmalet gebeurde der nietnt. 't Wos Philippe Gilbert die deuretrok en ne krêeg Samuel Sanchez en Jelle Vanendert mei. Die twêe hoaldn olle vluchters nog in en lietn oek Gilbert achter. Die twêe blêevn oek juuste vôorn Fränk Schleck, die edemarreerd wos van d'aar favorietn. 't Wos Sanchez die won, Contador verlôor mêer of en hoolve menute up Fränk Schleck en oek e seconde of vichtiene up d'aar favorietn.
In e bergrit die eigentlik gin echtn bergrit wos ('n top van de latstn klem, 'n Aubisque, lei up bykan 50 kilomeiters van de mete), blêevn der en hanfel coureurs vôorn. 't Wos lange Jérémy Roy die ollêne vôorn rêde, mor uuteindelik kustn Hushovd en Moncoutié nem werepakkn en 't wos 'n Nôor die won, in zyn boai van weireldkampioen.
Van e vroegn vlucht blêef Sandy Casar 't langste over, mo ne moeste oek plôoin up 'n klem van Plateau de Beille. Up 7 kilomeiters van 'n arrivee gienke Vanendert weg en 'n hield het uut.
'n 16sn rit wos e styvn rappn rit, woarin dat Ryder Hesjedal 'n latstn wos van e vlucht, vôorn dat 'n inhoald wos deur 2 Noorn; zyn ploegmoat Thor Hushovd en Edvald Boasson Hagen. Die drie sprinttn voun de zege en 't wos Hushovd die 't hoalde, vôorn Boasson Hagen en Hesjedal. Contador, Samuel Sanchez en Evans kustn nog wegryen van d'aar favorietn en bitje tyd pakkn.
In 'n êestn echtn Alpnrit gienkt er ol vroeg e groeptje van 14 weg, doaby zat er 1 Belg: Bjorn Leukemans. Up 'n klem no Sestrière sproungt Perez Moreno van Euskaltel weg, mor up 'n noastn klem no Pramartino wos 'n weerepakt deur Chavanel en bitje loater oek deur Boasson Hagen. 'n Dienn demarreerde toune van Chavanel en n'hield het uut toet an de mete en wonn zyn twiddn rit. Voun 't gilf verlôor Voeckler e bitje tyd deur at 'n in de latste ofdoalienge uut 'n droai gienk en up en uprit van en huus uutkwam, in 'n zestn droai hadde Hivert van Saur-Sojasun oek ol rechtedeure egoan.
Pinerolo (ITA) > Col du Galibier (Serre Chevalier)
In 'n keuninginnerit over 3 cols buutn categorie (Colle dell'Agnello, Izoard en Galibier met de mete up 'n klem) gienkt er groeptje weg met doarin oundermêer Dries Devenyns en Maxime Monfort. Up 'n Izoard, up 60 kilomeiters van de mete, demarreerde Andy Schleck en 't gienk niemand mei. In d'ofdoalienge kwam Schleck byn zyn ploegmoat Monfort en tope hoaldn ze iederêen in. In 'n anloop no 'n Galibier, e lastig stik in 't dal met de wiend teegn, dein surtout Monfort en Schleck 't werk, Devenyns dei oek zyn dêel, mor Iglinski en Roche dein nie aars of sleepn. At 'n klem echt beguste, gienk Schleck ollêne deure en ne kuste 't houdn toet an de mete, woa dat 'n e bitje mêer of 2 menuutn idder wos of zyn broere Fränk. Evans, die zevve 2 menuutn ofedoan had van 't gat da Schleck hadde, wos 'n derdn. Voeckler endigde 'n vuufdn, woadeure dat 'n 15 secondn overhield in 'n stand up Andy Schleck. Contador moeste lossn woadeure dat zyn Tour verlôorn wos.
In e kortn rit van juuste mêer of 100 kilomeiters gienkt er e groeptje weg woavan dan der up 'n top van 'n Galibier ('n twiddn col achter 'n Télégraphe) nog 2 overschôotn: Rui Costa en Riblon. Dedie kustn in 't wiel bluuvn van Contador en Andy Schleck, die wegesproungn woarn van d'aar favorietn. In d'ofdoalienge kuste Samuel Sanchez oek nog were kommn en in 'n anloop nor Alpe d'Huez kust er e groeptje met Evans en oek nog e groep van e man of 40 werekommn. Up da moment gienkn Pierre Rolland en Ryder Hesjedahl weg, ze kustn met bykan e menute an Alpe d'Huez begunn. Doa sproung Contador rechtet weg en niemand kuste mei. Contador liet iederêen achter, mo Sanchez en in zyn wiel Rolland kustn up 't ende werekommn en 't wos Rolland die nog kuste demarreern en ezo 'n êestn Fransman kommn die e rit won. Contador had up e moment mêer of e menute up Evans en de Schlecks, mor uuteindelik hield 'n e hoolve menute over an de mete. Thomas De Gendt kuste mei met de betere en endigde 'n zesdn in e rit woarin dan olle boais buutn 'n groenn van schoers veraardn.
Cancellara, die 'n grôotn favoriet wos voun 'n tydrit, moeste in de rinne ryen en endigde dus mo 'n achtsn. 't Wos Thomas De Gendt die lange 'n êestn tyd hadde, toet dat Tony Martin doa mêer of menute ounder gienk. 't Wos vaneigns surtout de 57" dat Andy Schleck vôornhadde up Cadel Evans die telde en nog vôorn hoolf koers hadde Evans dadde ol inhoald, an de mete wos 't verschil 2'30 en ezo won 'n Australiër zyn êestn Tour.