Persoonlikke informoatie | |
Noame | Mark Cavendish |
Bynoame | Manx Missile Manx Express Cannonball Cavendish |
Gebortedoatum | 21 meie 1985 |
Geborteplekke | Douglas, Eiland Man, Verênigd Keunienkryk |
Lengte | 175 cm |
Gewichte | 69 kg |
Specialisoatie | Sprint Ploegkoers (vroeger) |
Ploegen | |
Ploeg van nu | Quick-Step |
Ploegen van toun | -Team Sparkasse -T-Mobile -Team Sky -Quick-Step -Team Dimension Data -Bahrain McLaren |
Mark Cavendish (Douglas, Eiland Man, 21 meie 1985) is e Britschn coureur die voun 't moment 'n rapsn sprinter is. En is begunn up de piste (woarup dat 'n ol weireldkampioen ewist is, in de de ploegkoers) en is loater mêer en mêer up de boane begunn ryen. En het oundertusschn ol 34 rittn ewonn in 'n Tour en êen klassieker ewonn, Milaan-San Remo in 2009.
't Zyn der vele in 't peletong die van Cavendish nie en moetn weetn omda 't e dikkenekke zoudt zyn. E stiksje uut Procycling van oktober 2008 toogt dadde:
In 'n Tour van 2010 toogdn zyn troann dat 't nem wel ku scheiln wuk dan de menschn peizn van nem. Zyn sportief directeur, Brian Holm, zegt oek: Buutn de koers is 't e goein keirel, e belt nie voun te zoagn, mo voun te vroagn hoe dat goat of me wuk daj bezig zyt.
Cavendish is begunn ryen met e BMX en loater van tyd, at 'n 13 wos, met 'n montebike. Lik vele Iengelsmans is 'n êest begunn ryen up de piste, in 2005 wont 'n in Los Angeles de ploegkoers me Robert Hayles, vôorn d'Hollanders Stam en Slippens en de Belgn Gilmore en Keisse, olhoewel dan ze vantevôorn nog nôois tope ereen haddn.
E kwam oek nog Europees kampioen puntekoers en in 2006 de Speeln van 't Gemênebest voun 't eiland Man, die doar apart upkomt.
In 2006 wos 'n êest stagiair byn Sparkasse, 't joungernteam van T-Mobile (egroeid uut Deutsche Telecom, loater van tyd Team Highroad, Team Columbia en HTC-Columbia van noame ewist), in 2007 mucht 'n echt begunn, byn da zeste T-Mobile. En hadde 't moelik in 't begun, want ne kuste bykan gin êen koers uutryen. Zyn êestn koers dat 'n wel kuste uutryen, wos de Scheldeprys, dat 'n van 'n êeste kêe wonne. E muchte oek mei no 'n Tour, mo doa viel 'n in d'êeste twêe rittn ('n êestn wos in Londn en ewonn deur McEwan en 'n twiddn no Gent en ewonn deur Gert Steegmans vôorn Bôone) en ne gaf uuteindelik up in 'n achtstn rit. E won da joar wel 11 koersn, ollêne Petacchi won in zyn êeste joar eevnvele koersn.
In 2008 kwam de grôote deurbroake. Êest wont 'n tope me Bradley Wiggins 't weireldkampioenschap ploegkoers in Manchester, in oest gienk 'n tope me Wiggins no d'Olympische Speeln, mo doa wos 'n 'n ênigsn Iengelsman die gin medaille kuste winn up de piste, Wiggins won wel nog d'achtervolgienge, individueel en in ploeg. In 'n Giro wont 'n voun 'n êeste kêe e rit in e grôote rounde, e gienk doa nog e twiddn winn en in 'n Tour zest viere, e gaf toune up in 'n vichtiensn rit voun t'enterneern voun d'Olympische Speeln.
In 2009 dei 'n nog beter, e won Milaan-San Remo, doa kus 'n Heinrich Haussler juuste vôorn de mete remonteern. Doavôorn had 'n ol twêe rittn ewonn in de Rounde van Qatar en êen in Tirreno-Adriatico. E trok zyn goeie forme deure en ne wos oek 'n bestn in 3 rittn en 'n ploegtydrit beisn 'n Giro, achter zyn derde winste, het 'n upegeevn voun e bitje te kunn rustn voun 'n Tour. In de vôorbereidienge no dienn Tour wont 'n 2 rittn in de Rounde van Zwitserland en ne beguste me vele vertrouwn in de Grande Boucle. E dei wuk at iederêen verwachtte en da wos winn, zes keirs zest. 'n Groenn boai kust 'n wel nie winn, in êen rit is 'n edeklasseerd, woadeure dat Thor Hushovd nem pakte.
In 2010 wos 't ollemoale e stik miender in zyn vôorbereidienge. Deur zêer an zyn tandn kust 'n mor in februoari begunn ryen, in de Ruta Del Sol. E moeste lossn in Milaan-San Remo, mor e kuste egliek winn in de Rounde van Catalonië en in de Rounde van Romandië, woa dat 'n wel uut koers hoald is deur zyn ploeg, achter dat 'n over de mete kwam me 't V-têekn, die in Iengeland 't zeste wult zeggn lik je middnstn vienger upsteekn. En hadde 't moelik en in 'n êestn sprint van 'n Tour makt 'n verkêerde keuzn, woadeure dat 'n mo 'n twoofsn wos. 'n Dag derup wont 'n wel en ne moeste indeliks bleitn up 't podium en beisn interview, deur ol de zoagienge dat 'n ol ekreegn hadde. 'n Dag derup sprintte 'n were no d'êeste plekke, zyn twoofsn rit in 'n Tour. In de doagn doarup won 'n nog 2 rittn, oek up 'n Champs Elysées won 'n me ze viengers in zyn neuze.
In 2011 dei Cavendish were wuk dat 'n goed kut: rittn winn. E won ter vuve in 'n Tour en oek 'n groenn boai, voun 'n êeste kêe in zyn carrière.