Nascìu a Cartanissetta nnô 1902. Cumpiacennu u disìu di so patri, chi u vuleva ncignèri minerariu, si scrissi a l'Università ri Palermu. Cumpletau però i so’ studi ô Politecnicu ri Torinu unni si laureau in ncignirìa elettrotecnica nnô 1927. A pàrtiri dû 1928 e pi quarant'anni travagghiau ô Comuni ri Torinu e, dû 1956 ô 1968, fu capudivisioni.[3]Murìu a Torinu nnô 1982.
Duranti a so carriera si occupau ri mpianti elettrici nterni, mpianti termici, gasdotti, riloggi, semafori. Nna l’anni Cinquanta prugittau macari na culunnina luminosa signaletica di mettiri a li firmati r'i tram. U so nomu però è ammintuatu finu a stiornu soprattuttu pi l'illuminazioni pubblica e li nuvità chi iddu appurtau a l’impianti di la città ri Torinu.
'N particulari un rolu assai significativu fu chiddu chi appi duranti i celebrazioni ri "Italia '61" pû centenariu di l'Unità d'Italia, quannu napocu di novi impianti foru prugittati e nstallati apposta pi l'occasioni.[4] A definizioni ri Torinu comu “ville lumière italiana”, chi cuminciava tannu a circolari, addiventau accussì chiù chi mai apprupriata.[5] Cu i moderni applicazioni e l’intuizioni ri Guido Chiarelli, pi la prima vota l'illuminazioni pubblica appi macari un risvoltu artisticu, comu dimostratu in particulari di l’illuminazioni di li funtani e dû "giardino roccioso" ô parcu dû Valentinu, rializzati pi l'esposizioni universali dû 1961, eventu chi attirau chiossai di 4 miliuna ri visitaturi nnâ prima capitali taliana. Sempri nnô 1961, Guido Chiarelli rializzau u progettu ri illuminazioni di la Mole Antonelliana, opira chi cumplitau i travagghi di la costruzioni di la guglia.[6]
Nnô 1958 fu nsignitu di l'onorificenza ri cavaleri e nnô 1965 ri chidda ri ufficiali "al merito della Repubblica Italiana".
Nnô 2011 duranti i festeggiamenti pi li 150 anni di l'Unità d'Italia a so òpira fu ricurdata a Torinu nna tri occasioni: cu i cartilluna a Chiazza Carignano (5 giugno)[7], ô Lingotto (8 luglio) e rintra a celebrazioni dû 24 lugliu a l’officini granni riparazioni (organizzata di l'associazioni amici ri Italia 61 pû progettu iu c'era) e tannu fu macari liggiuta a poesia U iardinu ncantatu a iddu dedicata.[8] Ad Agliè (Torinu) u 9 giugnu 2012, pi l’occasioni di l'assegnazioni r'i premi dû cuncursu letterariu U meleto ri Guido Gozzano, Guido Chiarelli vinni ricordatu cu 'n secunnu componimentu poeticu An evening sky, relativu a l’operi ri illuminazioni chi iddu avia rializzatu. U 3 lugliu 2019, nnô parcu du Valentino, a la prisenza di li autorità cittadini, si fici a cerimonia pû scoprimentu ri na targa commemorativa pû travagghiu fattu di Guido Chiarelli dû 1928 ô 1968 pû Comuni ri Torinu.[9]
Sennu chi si ficiru li 120 anni di quannu chi nascìu, nna lu saluni di li festi di la Villa Amoretti di Turinu, vinni organizzata la granni mostra Luci pi la cità chi ci participaru na sittantina di artisti.[10]
Lu jornu 28 dicembri 2023 a Caltanissetta fu scuperta na targa pi onurarini la mimoria a la prisenza di lu Pruf. Enzo Falzone, storicu e studiusu di la cità, e di l’autorità citadini in particulari di l’assissuri Cettina Andaloro e Marcello Frangiamone. Pi nteressamentu di Marco D’Arma, Prisidenti di lu quarteri Provvidenza, la targa fu misa in via Narese 27, unni Guido Chiarelli abitau nsina a lu 1922.[11]
AIDI (Associazione Italiana d'Illuminazione), Aspetti dell'illuminazione pubblica di Torino, atti del 1º Convegno Nazionale AIDI (Torino, 11-13 maggio 1961), Torino, Ilte, 1961.
Chiara Aghemo, Luigi Bistagnino, Chiara Ronchetta, Illuminare la città. Sviluppo dell'illuminazione pubblica a Torino, Torino, Celid, 1994.
Alessandro Guido Actis, Marco Bodo, Mario Broglino, Torino di Luce, Pinerolo, Alzani, 2006.