Lu mpiraturi dû Sacru Rumanu Mpiru, Lotariu II, organizza na campagna militari cu l'obbiettivu di 'nsidiari lu papa Nnuccenzu II a Roma, all'èbbica occupata di l'antipapa Anacletu II. La spidizzioni havi lu sustegnu puru dî ripùbbrichi marinari di Pisa, Genova e Vinèzzia, comu puru di lu mpiraturi bizzantinu Giuvanni II Comnenu, e di la forza di pirsuasioni di san Birnardu di Chiaravalli. Di l'autra banna l'antipapa è appuiatu sulu di Ruggeru II di Sicilia. La spidizzioni havi nu certu successu, cunquistannu armenu timpuraniamenti diversi cità nurmanni comu Salernu, Bari, Melfi, e l'abbazzia di Munticassinu. Ruggeru II però nun si movi di Palermu, e l'esercitu mpiriali, doppu la lonca campagna rinunza a assicutari Ruggeru e si nitorna 'n Girmania, senza arrinèsciri a 'nsidiari Nnuccenzu a Roma. Lotariu mori 'n Austria â strata dû ritornu ô misi di dicèmmiru.