Ch't' articl'ye fut c'menchie en Jèrriais
|
Victor Hugo (Févri 26 1802 – Mai 22 1885) est iun des pus grands auteurs d'la littéthatuthe Française.
I' d'meuthait en exil ès Îles d'la Manche dé 1852 à 1870. Il arrivit en Jèrri d'Bruxelles en 1852 et pâssit trais ans à Marine Terrace à Saint Cliément mais i' fut fliantchi hors en 1855 quand i' crititchit la Reine Victoria. Êpis i' s'en fut en Dgèrnésy où'est qu'i' d'meuthit à St. Pièrre Port à Hauteville House jusqu'à la tchête dé l'Empéreu Napoléon III.
Tandi qu'i' d'meuthait ès Îles d'la Manche, il avait à faithe auve les auteurs Nouormands d's Îles - il êcrivit à Jean Sullivan: "vous êtes, Monsieur, dans cette précieuse langue locale, un vrai Poëte".
I' prînt l'mot pieuvre et l'fit sèrvi dans san livre "Les Travailleurs de la mer" qu'il êcrivit en Dgèrnésy. Né v'là pouortchi qu'en Français d'achteu nou fait sèrvi eune pathole Nouormande pouor chutte bête mathinne à huit gambes.
À ches drein eune conmédie musicale sus san livre "Les Mînséthâbl'yes" a 'té hardi populaithe.