Rainer Weiss (nömmt Rai Weiss; * 29. September 1932 in Berlin) is en US-amerikaansch Physiker, de en vun de führen Wetenschapler bi dat LIGO-Projekt vun en Gravitatschonswellendetektor is. 2017 wurr hüm gemeensam Kip Stephen Thorne un Barry Clark Barish de Nobelpries för Physik för entscheeden Bidrääg to den LIGO-Detektor un de Opdecken vun Gravitatschonswellen tospraaken.[1]
Rainer Weiss is en vun twee Kinner ut en jöödsch-christlichen Familie. Sien Vader Friedrich Weiss weer Neuroloog, Kommunist un Früend vun de Familie Rathenau. Sien Familie is vör de Natschonalsozialisten in Düütschland tonächst nah Prag un 1938 wieder in de USA flücht.[2]
Weiss gung in New York City in de (Columbia Grammar School) un hett later an dat Massachusetts Institute of Technology (MIT) studeert, wo he 1955 sien Bachelor-Afschluss maaken dee un 1962 bi Jerrold Zacharias sien Doktertitel kreeg. As Post-Doktorand weer he bit 1962 an de Tufts University als Instructor un Assistant Professor un dornah an de Princeton University, wo he mit Robert Dicke un David Todd Wilkinson tosommen arbeiten dee. Af 1964 weer he as Assistant Professor an MIT, wo he 1967 Associate Professor un 1973 Perfesser wurr. Siet 2001 is he dor Professor Emeritus un to glieker Tiet Adjunct Professor an de Louisiana State University.
To sien Doktoranden tellt Nergis Mavalvala.
Weiss hett sück anfangs mit Atomphysik un de Entwicklung vun Atomklocken befaat. He weer in de 1970er Johren en vun de Pioniere bi dat Meeten vun den Kosmischer Mikrowellenhintergrund mit Ballonmessungen un weer denn leitend an den COBE-Satellit to de sien Meeten bedeeligt.[3] Enn‘ vun de 1980er Johren speel he en führen Rull bi de Entwicklung vun de Laserinterferometer för Gravitatschonswellendetektoren, wat in dat LIGO-Projekt münnen dee.[4]
1991 kreeg he de Exceptional Scientific Achievement Medal vun de NASA für dat COBE-Programm. He is Liddmaat vun de American Association for the Advancement of Science, de New York Academy of Sciences, de National Academy of Sciences un de American Academy of Arts and Sciences as ok Fellow vun de American Physical Society (APS). 2000 weer he Guggenheim Fellow un 2007 kreeg he den Einstein Prize vun de APS. 2006 kreeg he as Deel vun dat COBE-Team den Gruber-Pries in Kosmologie, 2016 nochmals, gemeensam mit annern in dat LIGO-Team. Ebenfalls 2016 kreeg he den Special Fundamental Physics Prize as ok den Shaw Prize, den Kavli-Pries un den Harvey-Pries. För 2017 wurrn hüm de Willis-E.-Lamb-Pries un de Prinzessin-von-Asturien-Pries tospraaken. Ebenfalls 2017 kreeg he den Nobelpries för Physik gemeensam mit Barry Clark Barish un Kip Stephen Thorne för sien entscheeden Bidrääg to den LIGO Detektor un de Observatschoon vun Gravitatschonswellen.[5]