ZE-P
|
Sta paggina chie a l'è scrita in zeneize, co' ina grafia tipo quella do Prian do 1745 |
Hans Christian Andersen, scritô daneize (Odense 1805 - Copenaghen 1875). Un di gren aotoî de fóe de l'Œuttoçento, o reutilizò in moddo originâ o gran patrimonnio de fóe nordiche, infondendo inte questo un caratteristego spiito ottimista. Un profondo sentimento idillico-religiozo e un'amaa conoscença da vitta se fondan, inte megio fóe, a creâ quella dupliçitæ e scimurtaneitæ de vixon fantastego-realistega, ch'a ghe consente i ciu ardii cangiamenti de registro, e ciu aodaxe mescciue de tente.
Figgio de un poveo caigâ, o trascorse l'infançia into so ciuzo mondo de senscitivo e fantaxiozo perdigiorno. Into 1819 o l'andò, in çerchia de fortuña, a Copenaghen e o se çimentò into canto, inta reçitaçion e inta dança, ma sença successo. I so primmi tentativi lettiai int'o stile romantego-ironico de Hoffmann, de Heine e de Waiblinger: Fodrejse fra Holmens kanal til Østpynten af Amager ("Viægio a pê da-o canâ de Holmen a-a ponta orientâ de Amager", 1829), Skyggebilleder af en rejse til Harz og det sachsiske Schweiz ("Schiççi d'un viægio into Harz e inta Sviççera sassone", 1831), Digte ("Poexie", 1830), son cose ben modeste; superfiçiæ e sconesci, ma no privi de cô, son invece i romançi Improvisatoren ("L'improvvizatô", 1834-35) e Kun en spillemand ("Un semplixe violinista", 1837).
Pù continuando a cortivâ o romanço (De to baronesser, "E doe baronesse"[1]) e a so infelixe pascion pe o tiatro (Den ny barselstue,"A nœuva cammia da paggioâ", 1845), za into 1835 A. o l'aiva començao a scrive e primme Eventyr portalte for børn ("Fóe narræ a-i figgiœu"), çimentandose in quello "genere menô" che, pe sempliçitæ de struttua e duttilitæ de mateia, megio o s'adattava a-o so estro fantastico. Tra o 1835 e o 1872 ne sciortì, in fascicoli squæxi annuæ, circa çentoçinquanta. A mateia tradiçionâ tenue e umile, faoesca, mitica, lezendiaia, a l'è chì sollevâ a dignitæ d'arte da una lengua viva parlâ antilettiaia, vibrante d'immediateçça e d'intimitæ.
Intimamente ligao a-o mondo de faoe, pe ton e prospettiva, l'è o Billedbog uden billeder ("Libbro figurao sença figue", 1840) e de scingole parte di tanti libbri de viægio scriti tra o 1840 e 1857 in Italia e in Greçia, in Turchia, in Sveçia e in Spagna. Importante pe a ricostruçion biografega, ma de scarso valô artistego a prolissa aotobiografia Levnedsbogen,[2] da pœu rielaborâ e conduta fin a-o 1855 in Mit livs eventyr ("A fóa da mæ vitta"); una continuaçion ch'a zonze fin a-i urtimi anni a l'è stæta pubbricâ into 1877.
Contròllo de outoritæ | VIAF (EN) 4925902 · ISNI (EN) 0000 0001 2118 4353 · SBN (IT) CFIV006256 · Europeana (EN) agent/base/60027 · LCCN (EN) n79022941 · GND (DE) 118502794 · BNF (FR) cb11888753s (data) · BNE (ES) XX1154847 (data) · ULAN (EN) 500130208 · NLA (EN) 36051401 · BAV (EN, IT) 495/40499 · CERL cnp00394063 · NDL (EN, JA) 00431436 · WorldCat Identities (EN) n79-022941 |
---|