Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
De Geulemerberg ies 'n helling die ziech bevingk tösje de Geul mèt de Geulemerwatermeule en 't gehuch Geulem en 't dörp Berg. Aan 't ondersjte deil van de berg liegke ouch nog (mergel)weuninge in lintbeboewing en dao tegeneuver de zgn. grotweuninge. Dat zint ónderkómmes, die oetgehouwe zint in de mergelberg. Tot rónd 1910 zint die bewoond gewaes. De Geulemerberg huèrde tot 1982 tot de gemeinte Berg en Terbliet.
Aan de Geulemerberg liek ouch de ingank van de Geulemergroeve. Dit ies 'n grot woa mergel gewonne woort. Es aandinke sjteit aan de vaart (saer 2007) 'n beeld in mergel van 'ne blokbreker es aandinke aan häöm en aan dit bekans neet miè oetgeoefend beroep.
In de Geulemergroeve bevingk ziech 'n zgn koepelgrot, 'n óndergróndse kapel, die in de Franse tied (ca 1800) ies ingeriech um katholieke en geistelike de gelegenheid te geve de katholieke godsdeens oet te oefene. Hie woort de Heilige Mès opgedrage, kinger geduip, getrouwd en begrave. De Geulemergroeve en de óndergróndse kapel zint rónd de Kaersjmes en op aafsjpraok te beziechtige.
De Geulemerberg ies e bekènd trajek in fietsrenwedsjtrieje zoa es de Amstel-Goldrace, Nederlandse- en Waereldkampioensjappe.
Op de Geulemerberg bevingk ziech 'ne hellingbösj, dae doorlöp tot Berg en Vilt.