Gestio
Geographia
Telos (Graece Τῆλος,[1] Neograece Τήλος ['tilos]) est insula a Rhodo ad boreo-orientem versa, in catena insularum Dodecanesi comprehensa. Una cum nonnullis insulis non habitatis est demus Graeciae regionis Aegaei Australis. Insula Turcice İlyaki vocatur, Medio Aevo nomine Italico Episcopio nota erat, cui forma Graeca Πισκοπή ([piskop'i]) respondet, quae in sermone cottidiano adhuc auditur.
Insula aream 61.48 chiliometrorum quadratorum occupat, summus mons (Propheta Elias) 612 metra surgit. Incolae sunt fere 500.
Anno 1971 multa elephantis pumilionis ossa (elephas tiliensis) inventa sunt, ultimis effossionibus reliquiae elephantis etiam minoris (Palaeloxodon antiquus falconeri). Parvo in museo Magni Chorii vici quaedam reperta exposita sunt.
Suda poetricem Erinnam, Sapphus amicam, (forsitan) in insula vixisse tradit.[2]
Anno 1309/1310 Telos in dicionem ordinis Fratrum Hospitalis Sancti Ioannis Hierosolymitani venit, quae usque ad Rhodum anno 1522 oppugnatam duravit. Variae munitiones illo tempore aedificatae sunt.[3] Postea Telos usque ad saeculum vicesimum ineuntem ad Imperium Ottomanicum pertinebat; anno 1912 insula Bello Italo-Turcico copiis Italicis occupata est.
Bello Orbis Terrarum Secundo, postquam Mussolini die 25 Iulii anno 1943 missus est, copiae Germani insulam occupaverunt. Multis locis belli instrumentorum reliquiae acria inter copias Germanas ac Britannicas testificantur proelia annis 1944 et 1945 commissa, cum milites Britannici ad insulam appellere conati sunt. Die 8 Maii anno 1945 demum in insula vicina Syme edictum est, ut Aegaeum mare austro-orientale in potestatem Britannicam redigeretur.[4]
Tilos Park Association (TPA) ab anno 2003 naturae protectionem in insula Telo adiuvat et periegesin oecologicam maturat.[5] Ab anno 2004 usque ad annum 2008 Unio Europaea instrumento fiscali nomine LIFE protectionem avium autochthonum fulsit, inter quas sunt falco eleonorae, hieraaetus fasciatus et phalacrocorax aristotelis.[6]
Anno 2009 insula ob diuturnum avium protegendarum studium et imprimis, quod ab anno 1993 venationem vetitam efficaciter prohibuit, praemium Euronatur obtinuit.[7]
![]() |
Vicimedia Communia plura habent quae ad Telum spectant. |
Agathonesium • Amorgos • Anaphe • Andros • Antiparos • Astypalaea • Calymnos • Carpathos • Casos • Cea • Chalce • Cimolos • Cos • Cythnos • Ios • Leros • Lipsi • Megiste • Melos • Myconos • Naxos • Nisyros • Paros • Patmos • Pholegandros • Rhodos • Seriphos • Sicinos • Siphnos • Syme • Syros • Telos • Tenos • Thera | |