Familia
Memoria
Irwin Allen Ginsberg (3 Iunii 1926 – 5 Aprilis 1997) fuit poeta Americanus, qui inter praestantes personas annorum 1950 et contraculturae annorum 1960 numeratur. Qui poeta aetatis Beat Generation vehementer militarismo, materialismo oeconomico, infestationi sexuali repugnavit. Poesi confessionali et praecipue poemate epico "Howl" innotuit, in quo perniciosam potestatem capitalismi et conformismi Americani vituperavit.[1][2]
In "Howl" Ginsberg sexualitatem suam et suas cum variis maribus, sicut diuturno socio Petro Orlovsky, coniunctiones exhibet.[3] Itaque dixit Clayton W. Horn iudex nihil obsceni in "Howl" esse: "Si quis suum vocabularium ad euphemismos vacuos et innocuos redigere cogatur, num de ulla preli vel orationis libertate agatur?"[4]
Ginsberg, homo Buddhismo dedicatus, multa et magna studia religionum orientalium exercuit. Vitam modestam vixit, a scrutariis vestes emptitavit, in conclavibus humilibus in East Village Novi Eboraci habitavit.[5] Unus ex maximis praeceptoribus eius fuit Venerabilis Chögyam Trungpa, Buddhista Tibetanus, qui institutum Naropa (quae nunc Universitas Naropana dicitur) in urbe Coloratensi Boulder condidit.[6] Ginsberg et Anna Waldman poetria a Trungpa impulsi scholam "Poeticae Disincorporatae" Iacobi Kerouac anno 1974 instituerunt.[7]
Ginsberg multa per decennia particeps fuit non violentarum reclamationum politicarum contra bellum Vietnamiense, bellum adversus drogas multaque alia taedia factarum.[8] "September on Jessore Road" poema, quo animos ad angustias profugorum Bangladesiorum convertit, exemplo est impigrae adsiduitatis, qua Ginsberg "politicae imperiosae et insectationi inpotentium reclamat."[9]
The Fall of America ('Conlapsus Americae'), corpus poematum, anno 1974 praemium nationale librorum poeticarum abstulit. Anno 1979 clipeum aureum circuli National Arts Club accepit et in Academiam artium et litterarum Americanam inductus est.[10] Praeterea anno 1995 libro Cosmopolitan Greetings: Poems 1986–1992 particeps fuit cartaminis finalis praemii Pulitzerani.[11]
Vicicitatio habet citationes quae ad Allen Ginsberg spectant. |
Vicimedia Communia plura habent quae ad Allen Ginsberg spectant. |