Nepal mencionesis unesmafoye en Vedika texto Atharvaveda Parisista, quale loko exportacero di lana kovrili. Tibeto-Burmana populi probable vivis en la regiono 2.500 yari ante nun. Princo Siddharta Gautama, pose Buddho, naskis en la regiono.
La moderna Nepal kreesis ye la 21ma di decembro 1768, kande Prithvi Narayan Shah, rejulo di la mikra principato Gorkha konquestis Katmandu ed unionis nedependanta rejii de la regiono di Himalaya, quankam ica uniono ne duris troe: de 1814 til 1816 eventis l'Angla-Nepalana milito, e Nepal perdis la regiono di Sikkim, okupita dal Britaniani.
La dinastio Shah finis en 1846, kante Jung Bahadur Rana konquestis povo pos ocidar diversa princi e centi di importanta personi en Katmandu. Lua decendanti konvertis su ipsa en heredantala chefministri dum ke la rejulo ne havis efektiva povo. La dinastio Rana duris til 1948, kande la rejulo Tribhuvan, direta decendanto di Prithvi Narayan Shah, rekuperis povo kun la helpo di Indiana chefministro Jawaharlal Nehru.
La monarkio duris til 28 di mayo 2008, kande Nacionala Asemblajo supresis la rejimo e transformis Nepal en republiko. Ye la 21ma di julio sam yaro la Nacional Asemblajo elektis Ram Baran Yadav kom prezidanto.