.jpg) (2019)  | |
| Biografía | |
|---|---|
| Nacemento | 1984 (39/40 anos) Santiago de Compostela, España |
| Datos persoais | |
| País de nacionalidade | España |
| Actividade | |
| Lingua | Lingua galega |
  | |
Marta Pérez Torre, nada en Santiago de Compostela o 29 de febreiro de 1984, é unha actriz e presentadora de televisión galega.[1] Debe o seu nome artístico, Marta Doviro, ó alcume da súa familia paterna, orixinaria da aldea de Viro, en Outes.
Marta Doviro criouse entre Muxía e Corcubión e con 17 anos volveu a Santiago de Compostela, onde estudou tres anos de farmacia. Nesta etapa gañou o concurso de moda local organizado por El Corte Inglés e quedou finalista en dúas ocasións no concurso de moda Top Área Central. Logo deses tres anos decidiu mudarse a Ourense onde finalmente se diplomou en Deseño de Produtos na Escola de Arte e Superior de Deseño Antonio Faílde.[Cómpre referencia]
Logo desta etapa de estudante foi vivir á Coruña onde estivo traballando no departamento de mercadotecnia da firma galega de moda Caramelo.[1]
Presentou A mochila do viaxeiro en V Televisión, traballo polo que foi nomeada a un Premio Mestre Mateo no ano 2011 na categoría de Mellor Comunicadora. Na Televisión de Galicia presentou De quen vés sendo? en 2013, Somos ben curiosos en 2015[2] e Máis galego nos veráns de 2014 e 2015. Por este último foi finalista, de novo na categoría de mellor comunicadora, dos Premios Mestre Mateo 2014.
Presentou xunto a actriz Isabel Blanco o programa Especial 30 anos de Series da TVG e acompañou a Xosé Ramón Gayoso copresentando Luar en xullo do 2015. Ese mesmo verán retransmitiu en directo as fogueiras de San Xoán nun programa especial da TVG xunto a Lucía Rodríguez Vázquez e Bernardo Montaña.[Cómpre referencia]
No ámbito da interpretación participou como "Doutora Pita" na serie de televisión Luci en 2014, e deu vida a "Olalla" na serie Pazo de Familia desde a súa incorporación de 2015 a 2017, na 3ª temporada e durante dúas máis, ata a penúltima da serie.[Cómpre referencia]
En 2016 participou no especial de Nadal de Larpeiros (TVG), e nos anos 2016-2017 presentou Feirantes[3] e Gastrópodos, cociña en ruta na TVG.[4] Tamén en 2017 rodou a curtametraxe O jazz dos proscritos, de Manuel Gil Castro.
En 2018 acadou o seu terceiro nomeamento ós premios Mestre Mateo como mellor comunicadora co programa Unha viaxe para contar, tamén na TVG.[5] Na gala tamén se encargou de entregar un dos premios.[6] A finais dese mesmo ano, comezou a gravar a segunda tempada do programa Malo será, que se emitiu ó longo de 2019 na TVG, no que exerceu de presentadora, e ocasionalmente tamén participou actuando nalgún sketch, sendo a súa primeira incursión no mundo do humor.[7] Todo isto combínao coa presentación de diversas galas de moda, deportivas, benéficas, culturais e de festas, participacións en programas de radio na Radio Galega e en Radio Coruña, especiais de Nadal do programa "Coma un allo", entrevistas no programa A Revista, e en obras de teatro como E se os soños se cumpren, coa compañía O Garaxe Hermenéutico, para o público infantil. Tamén impartiu en 2019 clases de teatro.
Así mesmo, volveu ó mundo da publicidade ó protagonizar en 2019 un spot televisivo para o lanzamento de MEGA da cervexeira Estrella Galicia.[8][9]
| Ano | Categoría | Título | Resultado |
|---|---|---|---|
| 2011 | Mellor comunicadora | A mochila do viaxeiro | Nomeada |
| 2014 | Mellor comunicadora | Máis galego | Nomeada |
| 2018 | Mellor comunicadora | Unha viaxe para contar | Nomeada |
 |
Wikimedia Commons ten máis contidos multimedia na categoría: Marta Doviro  |
