Riedike | |
---|---|
![]() | |
Basisdatä | |
Staat: | Schwiiz |
Kanton: | Züri (ZH) |
Bezirk: | Uschter |
Gmeind | Uschter |
PLZ | 8616 |
Koordinate: | 696193 / 243145 |
Höchi: | 440 m ü. M. |
Flächi: | ca. 3 km² |
Iiwohner: | 800 (31. Dezember 2011)[1] |
Website | www.riedikon.ch |
Charte | |
![]() |
Riedike (amtlich: Riedikon) isch än ehemaligi Zifilgmeind und än Ussäwacht fo dä Stadt Uschter im Kanton Züri.
Riedike isch äini fo dä sogenannte Ussäwachte vo dä Gmäind Uschter. Riedike hät sin ländliche Charakter total bewaart und schtaat äsoo im föllige Kontrascht zur Induschtryschtatt Uschter. S Dorf befindät sich am südöschtliche Uufer fom Gryfäsee. Durs Dorf flüsst dä Tüfenbach, wo nordweschtlich fom Dorf in Gryfäsee flüsst. Id de Bach flüsst fo Nossike her dä Klusbach. Die weschtlichi Gränze fo Riedike bildet d Mönchaltorfer Aa. Riedike gränzt im Nordä a Nideruschter, im Oschte a Nossike, im Süde und Sudwescht a Mönchaltorf und im Nordweschte an Gryfäsee.
Dur Riedike füärt d Kantonsschtraass Nr. 716 vo Uschter uf Egg, wo äu zur Uufaart uf d Schnällschtraasss über d Forch uf Züri gaat. Ussärdem gits fo Riedike Schtrasse uf Nideruschter, Nossike und Mönchaltorf. As öffäntlichi Färcheersnetz ischt Riedike dur d Buslinie 842 fom Bahnhof Uschter nach Ötwil aagschlosse. Die Buslinie isch bis 1953 äs Tram gsy, di sogenannti Uschter-Ötwil-Bahn.
Än Grosstäil fo dä Ywonner fo Riedike sind Pändler, wo in Züri oder in Uschter schaffäd. S Dorf sälber hät sin Puurädorfcharakter erhaltä und es git in Riedike no färschidäni Puuräbetryb. Näbed äm öschtliche Färcheerschräisäl hät s ä Tankschtell mit ämänä Ladä, wo täglich bis z Nacht am zähni offe hät. Im Nordä git s links fo dä Schtraas nach Nideruschter ä Chyssgruäb und rächts än Golfplatz.
Di erschti schriftliche Erwäänig fo Riedike datiert us äm Jaar 741 inäre Schänkigsuurkundä fom Chloschtär Sanggallä. Riedike isch somit de Täil fo Uschter, wo als erschtä schriftlich erwäänt worden isch no for Uschter sälber.[2]
Bis Aafang nünzänts Jaarhundärt isch Riedike än äigäti Zifilgmäind gsy. Am 9. Juli 1927 sind di ehemalige Zifilgmäinde fo Uschter zur hüttige politische Gmäind Uschter zämägläit worde.[3]
Di gröschti Sehäswürdigkäit fo Riedike isch natürlich s Naturschutzgebiät rund um dä Gryfäsee. Im Schilf am See läbäd zaalrichi Tier- und Fogälartä, wo zum Täil fom Uusschterbe bedroot sind, untär andärem Wysschtörch.