Dr Karlheinz „Kalle“ Jung (* 3. Novämber 1952 z Zäll) isch e dytsche Sozialaarbeter, Bedriibswiirt un Verwaltigsdiräkter.
Dr Karlheinz Jung isch isch z Lörrach in dr Haagenerstroß un speter im Obermattweg z Stette bi Lörrach ufgwagse. Syy Vater, Gerhard Jung, isch Oberamtmann bi dr Boscht gsi un derzue e bekannte Schwarzwälder Dialäktdichter, syy Mueter, Klara geb. Wuchner, Huusfrau. Dr Kalle Jung het zwai Gschwischter, e jingere Brueder, Markus Manfred Jung, e Gimnasialleerer un alemannische Dialäktdichter, un e jingeri Schweschter, Sabine verh. Ging, e Musiklehreri.
No dr Schuel het dr Jung vu 1974 bis 1978 han dr kadoolische Fachhochschuel z Fryburg Soziaalaarbet studiert un mit em Diplom abgschlosse. Är het zee Joor in dr Chinder- un Juugedpsychiatry vu dr Universiteetskliinik Fryburg gschafft un isch derno zee Joor Personaalrootsvorsitzer gsii.
Nääbehäär het er e Uusabildig zum Hochschuelfachökonom Personaalwääse (Abschluss 1997) gmacht un derno vu 1997 bis 1999 an dr Fachhoochschuel AKAD Leipzig Bedriibswiirtschaft studiert un en Abschluss as Diploom-Chaufmann (FH) gmacht. Syni Diploomaarbet het er gschriibe iber Mitarbaiterfierig im Chrankehuusmänätschmänt. Är isch derno in d Verwaltig vum Universiteetskliinikum gwägslet un het in verschiidene Laitgsfunkzioone gschafft, unter anderem as Laiter vum Gschäftsberaich Personal un Wiirtschaft, zletscht as stellverdrättende chaufmännische Diräkter. Im Rame vu syre Aarbet am Universiteetsklinikum isch er au Gschäftsfierer vu zwoo Doochtergsellsychafte gsiis, dr „Gesellschaft für Wissen, Service und Material in der Medizin mbH (WiSMa) und dr „Kongress & Kommunikation gGmbH“. Zwai Joor lang isch er au Mitgliid im Ufsiichtsroot vum Universiteetsklinikum gsii.
Am Malik Management Zentrum z St. Galle het er e Zuesatzqualifikazioon in Sischteemoriäntiertem Mänätschmänt gmacht. Derzue het er e Uusbildig zum EFQM-Assessor gmacht.
Dr Karlheinz Jung isch Mitgliid im Uusschuss vum Bundesbildigsminischterium fir d Entwicklig vu dr Beruefsuusbildig zum Chaufmann im Gsundhaitswääse gsii un au Mitgliid im Vorstand vu dr Bedriibschrankechasse. Näbe syre Aarbet het er an dr Kadoolische Hoochschuel un an dr Evangeelische Hoochschuel z Fryburg verschiideni Leerufdreeg ghaa, unter anderem in dr Beraich Pflääg, Soziaalaarbet un Soziaalmänätschmänt. Am Aarbetsgriicht Fryburg het er eerenamtli fimf Joor lang as Aarbetsriichter gschafft.
An dr Leuphana Universiteet z Lüneburg het er anne 2010 bi dr Maria-Eleonora Karsten zum Theemaa „Krankenhäuser brauchen eine integrierte Personalentwicklung. Stand und Perspektiven einer integrierten Personalentwicklung an den Universitätsklinika Deutschlands, Österreichs und der Schweiz“ promoviert.
Vu April 2008 bis Oktober 2012 het er an dr Universiteetsmediziin Göttingen gschafft, zeerscht as Laiter vum Gschäftsberaich Personal, derno ab Mai 2010 as Laiter vum Zäntralberaich Vorstand.
Zum Novämber 2012 isch er as Verwaltigsdiräkter an di Evangeelisch Diakonissechrankehuus z Karlsruhe-Rüppurr gwägslet. No dr Fusioon vu dr Evangeelische Diakonissenaaschtalt mit dr St. Vincentius-Klinike Karlsruhe isch dr Jung Vorstandsmitgliid vu dr nei bildete „ViDia – Christliche Kliniken Karlsruhe“ woore.
Anne 1976 het dr Kalle Jung e Bryys bim Wettbewärb aktion junge mundart vum Alemannische Gsprächskrais im Regierigsbresidium Fryburg gwunne, 1984 het er bim Wettbewärb Jungi Mundart 84 vu dr Muettersproch-Gsellschaft mitgmacht. Gedicht vun em uf Alemannisch sin in dr Anthology D Hailiecher uusechuu. Syterhär isch dr Jung aber im Unterschiid zue sym jingere Brueder nimi as Dialäktautor in Erschyynig drätte.
Dr Kalle Jung isch ghyroote mit dr Ursula Jung, ere Chinderchrankeschweschter, un het mit ire zwee Siin.