Dr Markus Manfred Jung (* 5. Oktober 1954 z Zäll im Wisedal) isch e dytsche Dialäktdichter un Schriftsteller. Dr Jung isch hit dr bekanntescht un erfolgryychscht läbig alemannisch Dialäktautor z Sidbade.
Dr Markus Manfred Jung isch z Lörrach in dr Haagenerstroß un speter im Obermattweg z Stette bi Lörrach ufgwagse. Syy Vater, Gerhard Jung, isch Oberamtmann bi dr Boscht gsi un derzue e bekannte Schwarzwälder Dialäktdichter, syy Mueter, Klara geb. Wuchner, Huusfrau. Dr Markus Manfred Jung het zwei Gschwischter, e eltere Brueder, Karlheinz Jung, un e jingeri Schweschter, Sabine verh. Ging, e Musiklehreri. S Abitur het er anne 1974 am Hebel-Gymnasium Lörrach gmacht un derno Skandinavischtik, Germanischtik, Filosofii un Sport z Fryybeg un z Oslo studiert. Dr Markus Manfred Jung het im Johr 1990 d Marion geb. Frischmuth ghyrote, wu zwe Sihn in d Eh mitbrocht het, Yann (* 1980) un Manuel (* 1984). Ändi 2006 hän si sich scheide loo. Us däre Eh stammt e Dochter, Laura Sophia. Anne 2010 het er d Moleri Bettina Bohn (* 1954) ghyrote. Hite läbt dr Jung mit Frau un Dochter z Hohenegg im Chleine Wiisedal. Bis 2018 het er as Studiediräkter un Fachabteiligsleiter Dytsch un Sport am Theodor-Heuss-Gymnasium z Schopfe unterrichtet.
Anne 1976 isch dr Markus Manfred Jung zem erschte Mol as alemanische Dialäktdichter ufdrätte. Mit dr Verzellig "Chötzerig" het er dr 1. Pryys bim Wettbewärb aktion junge mundart vum Regierigspräsidium Sidbade, Fryybeg gwunne. Im Johr 1986 isch derno syy erschti sälbschtändigi Vereffetlichung erschine, dr Gedichtband rägesuur, in dr edition Isele
Mit em Dichter Thomas Burth het er 1989 d Internationale Mund-Art Literatur-Werkstatt Schopfheim grindet, wun er 2009 zum 21. Mol gleitet het.
1995 hän dr Wendelinus Wurth (Verleger), dr Markus Manfred Jung (Lektor) un dr Franz Handschuh (Grafiker) dr Drey-Verlag z Guetach grindet. Die drei häbn si gchännt vu dr regionale Kulturzytschrift D’Deyflsgiger, wu si in dr 1980er Johr zäme mitgmacht ghaa hän. Fir syy Programm het dr Drey-Verlag am 18. Jänner 2007 z Charlsrueh "Landespreis für literarisch ambitionierte Kleinverlage" iberchuu, wu mit 12 500 € dotiert isch.
Unter em Namme Wunderfitz vom Wald het dr Jung ab 1995 all zwo Wuche di alemannisch Kolumne Lueginsland in dr Badische Zytig gschribe. Wu die Kolumne anne 1997 hätt sotte yygstellt wäre, het s e Proteschtwälle dodergege gee, aagfiert vum Kaiserstieler Dialäkautor Harald Noth. Di Badisch Zytig het die Kolumne derno furtgfiert, sogar all Wuche syterhär. Vier Autore hän sich aafangs abwägslet: dr Markus Manfred Jung, dr Harald Noth, dr Philipp Brucker un dr Martin Schley. Ab 2000 het dr Wendelinus Wurth dr Brucker abglest un anne 2007 isch d Ulrike Derndinger di fimft Autori wore. As Noofolger vum Noth schrybt syt aafangs 2017 d Friedel Scheer-Nahor mit, un wu dr Schley 2019 ufghert het, sin d Beate Ruf un dr Martin Wangler derzue chuu.
Syt 2006 isch dr Jung Bresidänt vum Internationale Dialektinschtitut (IDI).
Im Johr 2019 isch er «Burgschreiber zu Laufenburg» gsi.[1]
In syre Laudatio uf dr Jung bi dr Verleihig vu dr Johann-Peter-Hebel-Gedenkplakette vu dr Stadt Huuse het dr Volker Habermaier iber dr Jung gsait:
„Jung geht häufig aus von kurzen, verknappten Beobachtungen aus der Natur oder von Erinnerungen an Gelesenes, Erfahrenes. Diese formuliert er in der Mundart. Dabei hebt er sie auf eine zweite oder dritte Ebene. Seine Texte setzt er gegen die Sprachvermüllung von heute. Er setzt auf die Kraft des Wortes. Dieses, besonders das in der Mundart, hat seinen ganz eigenen Klang. Dem horcht er nach, dem spürt er nach. Also: das Wort gegen die Wörter.“
Commons: Markus Manfred Jung – Sammlig vo Multimediadateie