Dr Frank Dietsche (* 18. Oktober 1938 z Berlin) isch e dytsche Leerer un en alemannische Liedermacher.
Dr Dietsche isch z Berlin uf d Wält chuu. Wun er drei Moonet alt gsii isch, isch sy Failie uf Chränzech zooge. Är isch z Löörech uf s Hebel-Gimnasium un derno uf Schuele z Baasel un z Bärn, wun er d Matura gmacht het. No dr Schuel het er z Bärn un z Minche Pedagoogik studiert un isch derno anne 1967 Grundschuelleerer woore. Unterriichtet het er an Schuele z Leiberdenga, z Sitzechilch un z Dannechilch. Ab 1970 het er z Sitzechilch gwoont, mittlerwyyli woont er z Obereggene. Är isch ghyroote un het mit syre Frau Traudel drei Chinder.
Aagregt dur dr Professor Percy G. Watkinson het er anne 1977 aagfange Lieder un Ballaade uf Alemannisch z schryybe un z vertoone. Är singt die Lieder zue dr Gitarre un het zwoo CD uusegee.
Im Dezämber 2000 het er d Johann-Peter-Hebel-Medaille vu dr Regionalgruppe Hegau vu dr Muettersproch-Gsellschaft iiberchuu. Im April 2003 isch er mit em Europäische RegioMundart-Bryys vu dr Europäische Kultuurstiftig „Pro Europa" uuszaichnet woore.