Brunegg | |
---|---|
![]() | |
Basisdate | |
Staat: | Schwiiz |
Kanton: | Aargau (AG) |
Bezirk: | Länzbrg |
BFS-Nr.: | 4193 |
Poschtleitzahl: | 5505 |
UN/LOCODE: | CH BNG |
Koordinate: | 658816 / 252363 |
Höchi: | 423 m ü. M. |
Flächi: | 1.55 km² |
Iiwohner: | 877 (31. Dezämber 2022)[1] |
Website: | www.brunegg.ch |
Charte | |
![]() |
Brunegg isch e Iiwohnergmeind im Bezirk Länzbrg im Schwiizer Kanton Aargau. S Dorf ligt am Fuess vom Chäschtebärg.
De Gmeindsbann isch 238 Hektare gross, dodervo sind 47 Hektare Wald und 29 Hektare überbaut. De höchschti Punkt isch uf 498 Meter, der tüüfschti uf 436. Nochbargmeinde sind Birr, Birret, Mägewil, Othmarsinge und Mörike-Wildegg.
S erschti Mol taucht s Dorf in ere Urkund us em Johr 1273 in de Namesform Brunegge uf. S isch am Fuess vom Chäschtebärg unterhalb vom Schloss Brunegg entschtande. Di urschprünglich Burg isch im 13. Johrhunder am Südrand vom Eigeamt bauet worde und het eme Minischterialegschlecht vo de Habsburger ghört. Di jewilige Burgherre hei au di nidere Grichtsbarkeit im Dorf gha.
Wo im 1415 d Eidgnosse de Aargau eroberet hei, het d Burg Brunegg Widerstand gleischtet. Gliichwohl isch s Dorf mit de Burg in de Bsitz vo de Bärner cho und het zum Grichtsbezirk Othmarsinge innerhalb vom Amt Länzbrg ghört. Im März 1798 sin d Franzose in d Schwiiz iimarschiirt u-n-hei di Helvetisch Republik usgruefe. Brunegg isch zum Kanton Aargau cho, wo mit de Umbildig im 1803 sini hütigi Usdehnig übercho het.