Buurechrieg isch e Sammelbegriff für Ufständ vo europäische Buure im spote Mittelalter und dr früehje Neuziit, aber no so spoot wie im 19. Johrhundert het s vereinzelti Buurerevolte ge. Hüfig wird s Wort für e Dütsch Buurechrieg bruucht, wo äng mit de Reformationschrieg im Dütsche Riich zsämmeghange isch. D Buure si nit immer elei gsi in ihrer Usenandersetzig mit dr Obrikeit, es het mänggisch au Stedt oder Adligi gha, wo mit ene sympatisiert und si understützt hai.
Nit alli Chrieg zwüsche enere Landbevölkerig und ere stedtische Obrikeit wärde as Buurechrieg bezeichnet. Dr militärisch Komflikt, wo dr Basler Kantonsdeilig vorusgange isch, isch zerst e Kampf um politischi Gliichberechtigung gsi, wo denn zum Unabhängikeitschrieg worden isch.
D Buure si bis in die neusti Ziit bi wiitem dr volksriichsti Stand z Europa gsi, gliichziitig aber au dä, wo politisch und militärisch am schwechste gsi isch und dorum am meiste usgnützt worden isch. Im Mittelalter si d Buure immer meh vo Adlige abhängig worde, wo se gege anderi Adligi beschützt hai, und drfür hai sich d Buure ihne müesse underwärfe. Die meiste von ene si Leibeigeni worde oder si wenigstens fast vollkomme vo ihre Grundherre abhängig gsi, wo si ihr Land von ene pachtet hai. Nume in gwüsse, im Allgemeine abglägene, Regione hai d Buure ihri Freiheit chönne bewahre.
Im Lauf vo dr Ziit, vor allem noch em Drissigjöhrige Chrieg, si d Frondienst, wo die hörige Buure hai müesse leiste, immer stränger worde und d Bestüürig immer höcher. D Obrikeite si hüfig ohni Verständnis gsi, für d Schwiirikeite, wo d Buure drunder glitte hei und hai sich sälte uf e Diskussion mit ene iiglo und die Konflikt hai sich mänggisch zu Chrieg eskaliert.
Im 18. und 19. Johrhundert het sich die juristisch Lag vo de Buure stark verbesseret, wo si im Lauf vo dr Buurebefreijig vo dr Leibeigeschaft glöst worde si.