Was isch bassiert?
- 744: D Beata, e Frou us eme ryche alemannische Gschlächt vo de Beata-Sippe im alte Zürigau, verchauft em Chloschter Sanggale ires chlyne Chlöschterli uf dr Insle Lützelau im Zürisee und Hoofgüeter i de Ortschafte Kemprate (hüt en Ortsdeil vo dr Stadt Repperschwil-Jona, Schmerike, Uzne im Kanton Sanggalle und Mönchaltorf, Riedike, Nussbärg (hüt i dr Gmeind Schlatt), Berlike (hüt z Buebike) und Nänike (hüt i dr Stadtgmäind Uschter) im Kanton Züri. D Urkunde, wo der Hiringus im Chloschter vo Bängge über die Schänkig gschribe und wo dr Graf Bebo signiert het, isch eini vo de eltischte im Chloschterarchiiv vo Sanggale.[1]
- 1918: Novämberrevolution: Dr Rychschanzler Maximilian vu Bade verchindet aigemächtig d Abdankig vum Chaiser Wilhelm II. un beufdrait dr Friedrich Ebert mit dr Amtsgschäft. Dr Sozialdemokrat Philipp Scheidemann rieft gege 14 Uhr vum Rychsdagsgebei di „dytsch Republik“ uus. Zwoo Stunde speter verchindet dr Spartakist Karl Liebknecht vum Berliner Stadtschloss uus di dytsch Räterepublik.
- 1932: Bi dr Uurueje vu Gämf 1932 verschieße Soldate vu dr Schwyzer Armee dryzeh Demonstrande bin ere antifaschistische Chundgebig un verletze sächzg schwär.
- 1938: Rychspogromnacht: Im Dytsche Rych chunnt s rychswyt zue organisierte Ibergriff gege Jude un jidischi Yyrichtige, wu unter anderem Synagoge in Brand gsteckt wäre. D Bolizei un d Fyyrwehr hän d Wysig iberchuu, nume nitjidisch Aigetum z schitze.
- 1953: Kambodscha wird unabhängig vu Frankrych.
- 1989: Fall vu dr Berliner Muur: Noch ere Prässekumferänz, wu s SED-Politbiromitglid Schabowski sofortigi Raisefreihait verchindet het, wäre d Gränzibergangstelle an dr Berliner Muur un an dr innerdytsche Gränze ufgmacht – des isch dr Aafang vum Änd vu dr DDR gsii.
