Ny anjara asa dia karazam-pifandraisana sy fifampiakinana misy eo amin' ny teny na andian-teny sy ny teny na andian-teny fototra mikambana ao amin' ny andian-teny lehibe kokoa (izay mety ho tarika na fehezankevitra na fehezanteny). Ireto ny anjara asa mateti-pitranga ao amin' ny fehezanteny: ny entimilaza sy ny lazaina ary ny fameno.
Amin' ny fitsipiteny malagasy, ankoatra ny entimilaza sy lazaina ary ny fameno, dia avahana koa ao amin' ny fehezanteny ny reny lazaina sy ny zana-dazaina, ny reny entimilaza sy ny zanaka entimilaza, ny reny fameno sy ny zana-pameno.
Ny entimilaza na vara dia anjara asan' ny teny na andian-teny anambaràna ny asa atao na ny asa mihatra amin' ny zavatra ambara amin' ny teny mitana ny anjara asa lazaina, na koa anambaràna ny toetrany na ny misy azy na ny fifandraisany amin' ny zavatra hafa.
Ny matoanteny matetika no misahana ny anjara asa entimilaza nefa afaka misahana izany koa ny mpamari-toetra na ny anarana na ny mpisolo sns arakaraka ny fiteny ka mety mila na tsy mila fampiasana matoanteny andry izany. Ny ankamaroan' ny boky mampianatra fitsipitenin' ny fiteny sasany ao Eorôpa (fiteny frantsay, anglisy sns) dia mampifangaro ny hoe "matoanteny" (izay sokajin-teny) amin' ny hoe "entimilaza" (izay anjara asan' ny teny) ka mampianatra fa ny fehezanteny feno dia ahitana matoanteny sy lazaina ary fameno.
Tsy ny matoanteny na ny mpamaritra ihany no azo atao entimilaza. Arakaraka ny fiteny na ny fahafahan' ny fiteny dia mety azo atao lazaina koa ny sokajin-teny toy ny mpisolo sy ny tambinteny. Ny andian-teny toy ny fehezankevitra koa dia azo atao entimilaza.
Ny lazaina dia anjara asan' ny teny misahana ny fanaovana ny asa na tompon' ny toetra resahina ao amin' ny fehezanteny tsotra amin' ny fiendrika manano.
Ny lazaina dia matetika anarana.
Tsy ny anarana ihany no azo atao lazaina. Arakaraka ny fiteny na ny fahafahan' ny fiteny dia mety azo atao lazaina koa ny sokajin-teny toy ny mpisolo, ny mpamaritra ary ny matoanteny. Ny andian-teny toy ny tarika sy ny fehezankevitra koa dia azo atao lazaina.
Tsy ny mpanao ny asa na ny tompon-toetra ihany no azo atao lazaina. Raha ovana fitodika ny fehezanteny dia mety ho ny teny misahana ny anjara asa iharana na toe-javatra no lasa lazaina ka ilay teny nisahana ny anjara asa lazaina teo aloha no lasa fameno (jereo: fameno mpanao). Arakaraka ny fiteny na ny fahafahan' ny fiteny dia azo atao lazaina ny teny na andian-teny ilazana ny iharan' ny asa na ny toe-javatra (fotoana, antony, vokany sns).
Ny fameno dia anjara asan' ny teny na andian-teny miankina amin' ny teny na andian-teny iray hafa ao anaty fehezanteny na tarika.
Ny fameno dia matetika anarana.
Tsy ny anarana ihany no azo atao fameno. Arakaraka ny fiteny na ny fahafahan' ny fiteny dia mety azo atao fameno koa ny sokajin-teny toy ny mpisolo, ny mpamaritra ary ny matoanteny. Ny andian-teny toy ny tarika sy ny fehezankevitra koa dia azo atao fameno.
Ny famenon' ny matoanteny dia fameno tsy azo sarahina amin' ny matoanteny ao anaty fehezanteny. Ny haiteny ankehitriny dia mampifanohitra ny famenon' ny fehezanteny amin' ny famenon' ny matoanteny. Matetika dia tsy azo afindra toerana sy tsy azo foanana ny famenon' ny matoanteny.
Ny famenon' ny fahezanteny dia teny atao fameno ao amin' ny fehezanteny nefa tsy miraikitra amin' ny matoanteny fa azo foanana na afindrafindra toerana. Ny ankamaroan' izay ataon' ny fitsipiteny mahazatra hoe fameno mpamari-toe-javatra dia famenon' ny fehezanteny raha azo foanana sy afindrafindra nefa tsy manova hevitra ny matoanteny.
Maro karazana ny fameno arakaraka ny fomba fijery anasokajiana azy.
Ny zanateny dia teny atao hilazana ny anjara asan' ny teny hafa na natao hampifandraisana teny roa hafa ao anaty tarika na fehezankevitra na fehezanteny (ohatra, ny hoe "amy" sy "ary" amin' ny teny malagasy). Misy sokajin-teny maromaro ny zanateny, dia ny mpampitohy, ny mpampiankina, ny mpisolo, ny mpamaritra sasany (tsy anisany ny mpamari-toetra), ny mpanoritra, sns. Matetika dia tokana anjara asa ny zanateny sady mifangaro amin' ny anaran' ny anjara asany ny anarany.