CG-1.5 Corredor Brión-Noia | |
---|---|
Identificador | ![]() |
Tipoloxía | Vía de altas prestacións |
Rede | Rede de estradas de Galicia |
Titular da vía | ![]() |
Dimensións | |
Lonxitude | 16,85 km |
Formato | 1 carril por sentido |
Localización | |
Inicio | AG-56 Brión |
Fin | AC-550 Noia |
Circulación | |
Tránsito | Rodado, non peonil |
Velocidade máxima | ![]() |
Restricións viarias | ![]() ![]() ![]() ![]() |
A CG-1.5 ou Corredor Brión-Noia[1][2] (na provincia da Coruña), é un corredor galego de altas prestacións da Xunta de Galicia que une as localidades de Brión e Noia; atravesa os concellos de Brión, Rois, Lousame e Noia. Ten unha lonxitude de 16,85 quilómetros e iníciase nun cruzamento coa AG-56 en Brión e finaliza nun cruzamento coa AC-550 en Noia.
Inicia na final da autovía AG-56 (autovía Santiago de Compostela-Brión) no lugar de Gundín (concello de Brión), seguindo á ligazón do lugar da Calle (concello de Rois) coa estrada AC-543 e varios camiños (un deles vai á estrada DP-1302, estrada de Negreira), seguindo á ligazón do lugar do Codeso (mesmo concello) coas estradas AC-543 e DP-7402, seguindo á ligazón do lugar de San Paio (concello de Noia) coas estradas AC-543 e DP-5702. Remata coa estrada AC-549 (variante de Noia e a ponte sobre a ría de Noia) e a ligazón coa estrada AC-550, no lugar de Orro (mismo concello).
A obra iniciouse en xullo de 2003[3][4] como parte do Plan Galicia, para dar unha alternativa á estrada AC-543 e unir Santiago de Compostela coa ría de Muros e Noia. En primeiro lugar construíuse a autovía AG-56, que une a zona do Rial (Conxo) enlazando coa autoestrada AP-9 no km 75 con Gontade (Os Ánxeles), logo de 12 quilómetros.
En xuño de 2009, retomouse o proxecto do corredor cun novo trazado, estimando que estaría rematado a finais de 2011.[5] Este viario e unha nova ponte sobre a ría, que fora promesa electoral durante a campaña, xa se prometera nos últimos tempos de goberno de Manuel Fraga.[6]
Os dous treitos, o primeiro treito, foi inaugurado o 5 de outubro de 2010[7][8][9] que une as localidades de Brión e Martelo, sendo inaugurado polo presidente da Xunta de Galicia, Alberto Núñez Feijóo, que auguraba que cando rematase a obra, desdobraríase en autovía. O segundo treito foi inaugurado o 16 de febreiro de 2011[10][11] que une as localidades Martelo e Orro e neste tempo, augurouse o desdobramento en autovía para 2015. A conexión coa nova ponte sobre a ría de Noia (estrada AC-549) foi inaugurado o 4 de xullo de 2014, esta devandita conexión é a final do corredor que lle rodea polo norte de Noia.[12]
O 3 de decembro de 2012 chocaron frontolateralmente dous vehículos á altura da parroquia de Urdilde (Rois), tendo que ser excarceradas tres persoas. Non houbo vítimas mortais.[13]
O 15 de novembro de 2014 produciuse un aparatoso accidente con 4 vítimas mortais, logo de que dous vehículos colisionaran frontalmente nunha xornada de chuvia intensa.[14] A raíz deste accidente, a Xunta incrementou as medidas de seguridade coa instalación de balizas e paneis informativos.[15]
O 20 de setembro de 2022 colisionaron de xeito frontal dous vehículos no quilómetro 27, á altura da parroquia de Roo (Noia). Houbo dúas vítimas mortais e un ferido grave, logo de que un dos dous vehículos invadise o carril contrario. Ademais, un terceiro vehículo viuse implicado, con dous feridos leves.[16]
Logo do accidente de 2014,[14] abriuse o debate entre asociacións de empresarios de axilizar o desdobramento do viario en autovía. Porén, a Xunta alegaba, mediante declaracións do vicepresidente Alfonso Rueda, que isto faríase "sempre e cando se dean unhas condicións obxectivas de falta de seguridade ou se o volume de tráfico se incrementa ata os dez mil vehículos diarios", cousa que non se producía. Con todo, datos oficiais da Consellaría sinalan que os 10.000 vehículos diarios supéranse nas datas estivais, e algunhas autovías nin sequera os alcanzan.[17]
En abril de 2015 deuse a coñecer o Plan de Medias de Circulación do ano 2014 (un documento da Administración autonómica que dá a coñecer o tráfico nos seus viarios), no que sinalan unha circulación media diaria de 9.017 vehículos polo corredor, o que supón medio millar máis ca o ano anterior. Sinala, igualmente, que no verán as cifras poden alcanzar os 13.000 vehículos ao día, con picos de até 19.000 algunha fin de semana.[18]
En outubro de 2015, co gallo da publicación da lista de vías perigosas pola DXT (na que se inclúe o corredor), reavivouse a vella demanda, esta vez polo concello noiés, de que se faga o desdobramento en autovía.[19]
En outubro de 2017, nos Orzamentos da comunidade autónoma inclúese unha partida de 250.000 euros para a redacción do proxecto de desdobramento do corredor en autovía, o que permitiría iniciar as obras en 2019.[20] En abril de 2018 a Axencia Galega de Infraestruturas adxudicou a redacción do proxecto á empresa Typsa, Técnica y Proyectos. A previsión do executivo autonómico é que as obras se inicien en 2019.[21] Un ano despois, e logo de tres exercizos seguidos superando os 10.000 vehículos diarios, as obras carecen de data de inicio.[22]
En outubro de 2021, nos Orzamentos séguese a incluír unha partida de 250.000 euros para o proxecto, pero especifícase que no ano 2023 investiranse 4 millóns de euros nesta vía, o que permitiría comezar o desdobramento do primeiro treito da autovía entre Gontade (concello de Brión) e Cedofeito (concello de Lousame).[23] Na actualidade, segue pendente do orzamento para o desdobramento.[24]
Denominación | Treito | Kms | Ano servizo |
---|---|---|---|
CG-1.5 | AG-56 Brión - AC-543 Martelo | 9,3 | 2010[7][8][9] |
CG-1.5 | AC-543 Martelo - AC-550 Orro | 7,6 | 2011[10][11] |