Edouard Louis Joseph baron Merckx (Meensel-Kiezegem (Vlams-Broabant), 17 juni1945) is een Belg die coureur wos van 1961 tot 1978. Merckx wordt algemêen aanzien als de bestn coureur oller tydn. In ze leven eit 'n 525 koersn gewon.
Merckx begost te koersen in 1961. Drie joar d'rachter wostn weireldkampioen by de liefebbers.
In 1966 wontn z'n êerstn Milaan-San Remo. Die koers etn zeevn keirs ewonn, en da's e record.
In 1967 wos'n weireldkampioen. In 't hêel wostn drie keirs weireldkampioen by de profs.
In 1968 woun Merckx de Giro (de Rounde van Itoalië). In 1969 wos Merckx betrapt op doping en e wos utgeslootn van de Giro. Merckx zei datn niet gepakt adde en da ze nem bedrôogn addn. Merckx goat in 't hêel vuuf keirs de Giro winn.
1969: Merckx woun de Tour (de Rounde van Vrankryk). E woun zes etappn, de geeln boai, (olgemêen klassement), de groen boai (puntnklassement) en de bolletjes (bergklassement). In dezen tour voerde Merckx e byzounder sterk nummertje op. In de beklimming van de Tourmalet kost er niemand mei. Moa Merckx rêed deure - solo, 140 kilometers: over de Soulor, de Aubisque en op 't platte. An de mete atn 8 minuutn vôorn op 'n twiddn. Sedertien klappn ze va "Merckxisme" en va de "Kanniboal".
Achter dat 'n estopt wos me koersn, isn begunn mi koersevilloos moakn in ze fabrieke in Sint-Brixius-Rode, e parochie binn Meise. 'n Dag va vadoage rydt va profploegn ollêne nog Topsport Vlaanderen mi zyn villoos. Vroegerder e Lotto der oek nog mei ereen.