El Tratato de Campoformio el xe sta firmà el 17 otobre 1797 da Napoleon Bonaparte, generałe a cao de l'exerçito francexe in Itàlia e el conte Louis de Cobentzel, chel raprexentava i Asburgo d'Austria. El xe sta firmà a Villa Manin (Passarian de Codroipo), che l'era ła demora istiva de l'ùltimo Doge, Lodovico Manin, ma scrivendoghe come łogo "Campoformio" (che ancó el se ciama Campoformido), un paexe picenin del Friul rente a Udine, parché l'era a meza tapa tra villa Manin, ndo Napoleon el stasea in quei mexi, e Ùdine, dove ghera el comando striaco.
Sto tratato el ga confermà i precedenti acordi de Leoben del 18 avril 1797, e in seguito a sto tratato sa desfà la prima coalizion antifrancese e xe finia la prima "canpagna d'Italia" de Napoleon. Una de le conseguenze de sto tratato xe sta la fin de la Republica de Venezia: difati bona parte dei veci teritori veneti (Veneto, Friul, Istria, Dalmazia) i ghe ndà a l'Austria, mentre Napoleon el sa tegnudo Brescia, Bergamo (che le xe sta unìe a la Republica Cisalpina) e le ìzołe Ionie. In canbio l'Austria la ga dato ai francesi el Belzo.
Controło de autorità | LCCN (EN) sh85019240 |
---|