In Seelterlound raakt dät ne ganse Riege Woolde un Wooldgebiede. Do Seelter Woolde hääbe sicher Noomen uut oolde Tieden, do mon fiellicht noch wier uutfiene kon. Fuul fon do Woolde lääse ieuwenske af nit fääre fon dän Seelter-Äi-Paad.
Fon dät Suude ätter dät Noude sunt do foulgenden Woolde tou fiende:
Näiwal, Haudsträite
Ap Näiwal lait juunuur dän fröieren Kanienkenbusk wäästelk ju Haudsträite un aastelk ju Seelter Äi dieräkt ieuwenske ju Siedlenge Kiefernsträite (Kiefernstrasse) n Wooldgebied.
N poor Hunnert Meeter noudelk därfon un noudelk ju Sträite Rotenbierich (Rotenberg) ieuwenske dät Nikko-Wierk läit uk n Wooldgebied.
Bäätholt
In Bäätholt is dät Gebied uum ju oolde Leemdobbe n wooldriek Gebied.
Noudelk Skäddel, aastelk fon ju Haudsträite ätter Hollen wai un wäästelk fon ju Seelter Äi läit n Wooldgebiet. Dät läit junuur fon do Wooldflächen fon dän Loanghoarster Iesk.
N poor Hunnert Meeter fierder noudelk is dan wäästelk fon ju Haudsträite noch ne Wooldflääche.
Loanghoarst
In dät Noude fon Loanghoarst lääse do Wooldfläächen fon dän Loanghoarster Iesk aastelk ju Seelter Äi un wäästelk ju Ostermoorsträite. Dät Gebied stount unner Natuurskuts.
Hollenerfoan
In Hollenerfoan noudelk un suudelk fon dän Hollener See lääse do Wooldfläächen fon Hollebierich.
Suudelk därfon un noudelk fon dän Loanghorster Iesk is ju Foutsättenge fon do Wooldfläächen fon dän Loanghoarster Iesk. Dät Gebied lait aastelk fon ju Reithalle in Hollen.
Roomelse
Aastelk ju Haudsträite ätter Strukelje, där wier ju Loangholter Sträite ap ju Haudsträite lapt, is n Wooldgebiet aastelk ju Seelter Ai.
An ju Iesksträite twiske Roomelse un Baalenje sunt n poor litje Woolde.
Strukelje
Ieuwenske ju Haudsträie an dän suudelken Skeed fon dät Tärp Strukelje is links n Wooldgebiet.
In düssen Gestrich suudelk Strukelje flooge al siet fuul Jiere snoagens oafte Roowfuugele, so dät mon därfon uutgunge kon, dät in disse Woolde do Fuugele hier Neeste hääbe.