Li turciniuna sù un piattu tìpicu dâ tradizioni dê parti di Rausa. Vènunu priparati ntô pirìudu di Pasqua. La tradizzioni voli ca s'hannu a manciari lu Sàbbutu Santu a menzijornu. Li ngridienti principali sù li trippi d'agneddu. La priparazzioni, sucunnu la tradizioni antica dê picurara di Rausa, ncumencia lu Jovidìa, quannu si macella l'agneddu. Appoi si pìgghiunu tutti li trippi e s'appulizzìunu, si cònzunu cu putrisinu, sali, cipudda e pipi spezzi, e si "nturcinìunu" cô vudeddu. La matina dô Sàbbutu Santu si còciunu nta na pignata, ntô furnu a ligna a focu astutatu.
Li cristiani ca pripàrunu li turciniuna sucunnu la tradizioni sù sempri cchiù picca, e stu piattu tìpicu, dô sapuri anticu, sta scumparennu.