Giuseppa Marcella Bella, o cchiù simpricimenti Marcedda (Catania, 18 di giugnu di 1952) è na cantanti siciliana, soru dû cantauturi Gianni Bella e di li musicisti Antonio Bella e Salvatore Bella.
Ntô 1972, doppu anni di gavetta c’avìa accuminzatu picca cchiù ca bammina e doppu la pubbricazzioni di quarchi 45 giri ca passa nussirvatu, junci â ntrasatta na granni pupularitati participannu a lu Festival di Sanremu cu Montagne verdi. Lu branu è pubbricatu dâ Cgd e eni scrittu dû binomiu Giancarlo Bigazzi-Gianni Bella (frati dâ cantanti), ca firma appoi tutti li granni successi anni Settanta di Marcedda.
Sequi na furtunatìssima participazzioni a Canzonissima, unni apprisenta àutri dui 45 giri di successu, Sole che nasce, sole che muore e supratuttu Un sorriso e poi perdonami, cu cui agghica a lu primu postu ‘n hit-parade.
Veni pubbricatu un primu album dû tìtulu Tu non hai la più pallida idea dell'amore, ca la jòvini cantanti dèdica a lu sò prudutturi Ivo Callegari. Ntê noti nterni, Renzo Arbore eloggia a Marcedda pi la grinta e la prufissiunalitati addimustrata già ô sò primu successu.
Nta lu 1973 idda utteni n’àutra granni affirmazzioni cu Io domani, ca ci rigala la vittoria ô Festivalbar (ex-aequo cu Mia Martini e la sò splènnida Minuetto).
Partècipa â Mostra Internazionale di Musica Leggera di Venezia cu Mi fa morire cantando, cover dâ cèlibbri Killing me softly with his song di Roberta Flack.
Nta l’autunnu lanza, nortri, un novu sìngulu di successu e zoè Mi... ti... amo, ca fà parti di lu novu, omònimu arbum (300.000 copi vinnuti).
Ntô 1974 ncidi lu primu asempiu di "disco music" taliana, cû branu Nessuno mai, vinnennu ortri 400.00 copi. Nta l’autunnu, lu novu sìngulu L'avvenire, veni scigghiutu di Arbore e Boncompagni pi la trasmissioni radiufònica "Alto gradimento".
Cuntimpuraniamenti nesci Metamorfosi, unu dî sò travagghi cchiù beddi ‘n assulutu (Gondola D'Oro per le vendite), nta cui spìccanu Soggetto umano e Venezia nella mente tra l’àutri, mentri Piccoli diavoli è lu retru di na nova, splènnida canzuna lanzata supra 45 giri dû tìtulu “E quando” (1975).
Sempri ntô 1975, pricisamenti lu 7 di giugnu, Marcedda arriggistra â Bussola di Viareggio lu sò primu arbum dû vivu, ca cuntrariamenti a li live cumminziunali, è cumpostu di canzuni quasi tutti nèditi.
Pùbbrica lu sìngulu Negro, àutru branu dî attimusferi disco ca pirò nun arrinesci a mpunìrisi comu Nessuno mai, puru mantinènnusi ‘n classìfica pi tanti simani.
Ntô 1976 ripruponi cu granni successu, e sempri ‘n chiavi dance, lu branu Resta cu'mme, clàssicu di Domenico Modugno. Utteni na discreta nuturitati macari lu retru dû sìngulu, Impazzire ti farò, una dî megghi provi ‘n assulutu di Marcedda.
Tutti li dui brani vèninu nclusi ntô novu album Bella: nfatti, a pàrtiri di stu mumentu, Marcedda accianca a lu sò nomo videmma lu cugnomu, speci doppu ca puru lu frati Gianni havi cunquistatu na granni nuturità, ortri ca un grossu successu discugràficu.
A ogni modu, l'arbum Bella è n’àutru dî sò megghi: Umberto Tozzi, ancora quasi dû tuttu scanusciutu, cumponi Mi manca, mentri digni di nota sunnu midemmi Rendimi il cuore e Parli parli, nterpritati cû cunzuetu pathos.
 fini di l'annu nesci supra 45 giri un novu branu firmatu di Umberto Tozzi e ntitulatu Abbracciati, ca Marcedda prisenta ‘n qualitati d’òspiti ô Festival di Sanremu 1977.
Sempri ntô 1977, quinni a pàrtiri di l'album Femmina, accumenza na fasi d’un canciamentu ca si cumpreta ntê primi anni Uttanta: la vuci dâ cantanti acquisici na maiuri carnalitati, li sò nterpritazzioni addivèntanu cchiù sinzuali e li testi cchiù ammiccanti.
Pruponi pi l'ùrtima vota n’àutru sìngulu di discretu successu mpruntatu â disco e zoè Non m'iporta più, mentri ntô 1978 si cuncedi un pirìudu d’abbentu, fatta eccizzioni pi la nisciuta d’un biddìssumu branu dûl tìtulu Mi vuoi e scrittu di Ivano Fossati.
Ntô 1979 lassa la Cgd e approda â Cbs, e pùbbrica l'arbum Camminando e cantando, ca s’avvali dâ cullabburazzioni di Gianni Bella, Mario Lavezzi, Dario Baldan Bembo, Beppe Cantarelli, e supratuttu d’Amedeo Minghi, puru iddu a l'èbbuca ca scanusciutu, ca firma arcuni testi. Nunustanti chistu, l'arbum nun utteni lu successu privistu.
Ntô 1980 nasci lu sò primugènitu Giacomo e lanza lu sìngulu pop Baciami, cu un retru midemmi cchiù ntirissanti dû tìtulu Rio De Janeiro.
Ntô 1981 partècipa a lu Festival di Sanremu cu Pensa per te, ca Marcedda ìnnica anni doppu comu lu sò pezzu peiu.
Lu rilanzu avveni cu la nisciuta, ntô stissu annu, d’un novu arbum ntitulatu simpricimenti Marcella Bella, comu a vuliri mèttiri a puntu lu novu cursu artìsticu, sancitu dû successu di lu branu Canto straniero.
Nta l’autunnu nesci un novu 45 giri di successu, Mi mancherai (cover di Don't walk away cu testu di Giorgio Calabrese), sigla finali di Domenica In.
Ntô 1982 nesci l'arbum Problemi, ca nun sùscita granni ntusiasmi margradu lu discretu successu dû sìngulu omònimu.
Ntô 1983 Mogol scrivi l'arbum Nell'aria, sempri supra mùsichi di Gianni Bella. Pi Marcedda è pratticamenti unu spartiacqua ntâ carrera: lu granni successu di Nell'aria addiventa sìmmulu di na difinitiva e furtunata svota sexy. Ancora oi Nell'aria cuntìnua a èssiri riprupostu ntê discutechi comu un cult, un veru sìmmulu di l’anni Uttanta.
Ntô 1984, supra l'unna di Nell'aria, Mogol cuntìnua a cullabburari nta l'arbum Nel mio cielo puro, ca picca si discosta di lu pricidenti uttinennu un bon successu.
Ntô 1985 Marcedda e Gianni ncìdinu L'ultima poesia, addivintatu un clàssicu nicu nta l'arcu dâ staggiuni estiva.
Ntô 1986 Marcedda torna ô Festival di Sanremu cu una dî sò canzuni cchiù beddi di sempri, Senza un briciolo di testa, arriniscennu a vìnciri cu strema simplicitati "la guerra delle dive" nta l'àmmitu dâ kermesse (Anna Oxa, Loredana Berté, Rettore...) cu un beddu terzu postu.
Succissivamenti nesci l'omònimu arbum Senza un briciolo di testa, ammizziusamenti rializzatu a Londra cu l’arranciamenti di Geoff Westly. Stu sàutu di qualitati cuincidi prubbabbirmenti cu l'àpici dâ carrera di Marcedda, ora apprizzata di pùbbricu e crìtica.
Ntô 1987 scadi lu cuntrattu cu la Cbs, ca dicidi di mannari la cantanti ancora una vota ô Festival di Sanremu cû branu Tanti auguri, scritta di Gianni Bella, supra testu di Gino Paoli (ca a l'èpica nun si rivilau p’arristari estràniu ô Festival). Si classìfica ô sestu postu, prima tra li fìmmini, uttinennu un bon successu.
Nesci macari l'omònimu arbum Tanti auguri, ariggistratu ancora una vota a Londra cu li straurdinari arranciamenti di Westly, ca risèntinu di nfruenzi vagamenti jazz.
A li disca di Marcedda hannu cullabburatu àutri granni arranciatura comu Celso Valli e Phil Palmer, st'ùrtumu prufissiunista di frama nternazziunali.
Ntô 1988 firma pi la Ricordi e è ancora a Sanremu cu Dopo la tempesta, l'ennèsimu, lusinghieru successu, ca fà di tràinu a l'Lp Marcella '88. La cantanti riggistra a Londra cu lu stissu team di l’arbum pricidenti, ma puru ‘n Girmania.
Ntô 1990 partècipa pi l'ennèsima vota ô Festival di Sanremu, ‘n cucchia cû frati Gianni, uttinennu un dignitusu riscontru cû branu Verso l'ignoto e cu l'omònimu arbum.
Dû 1991 è lu sò primu veru nzuccessu, puru siddu si tratta di n’àutru bedd’Lp, Sotto il vulcano, ca pirò nun godi d’arcuna prumuzzioni a càusa di nzanàbbili ncumprinzioni cu l'etichetta discugràfica. Ntô stissu annu nasci Carolina, la sò secunnugènita e ntô 1993 è la vota di Tommaso.
Tra la fini dû 1993 e lu nizziu dû 1994 nesci l'album Tommaso, nta cui Marcedda ricanta li sò principali successi, unitamenti a Io credo, c’avvanta la participazzioni straurdinaria di Remo Girone e ca veni nspigabbirmenti bucciatu dâ cummissioni ascuti dû Festival di Sanremu 1994.
Ntô 1995 pùbbrica pi la Cgd l'arbum Anni dorati, ntô quali ntèrprita li cchiù beddi miludìi di l’anni Quaranta e Cinquanta. Lu discu è cunfizziunatu di Gianni Bella, cu la cullabburazzioni di Geoff Westly, ma forsi nun è ancora lu mumentu pi stu tipu di’upirazzioni, ca mmeci veni lanzata nta l’anni succissivi di artisti taliani e nternazziunali, cu granni riscontru.
La brevi tournèe primavirili ntraprisa di Marcedda cu na granni archestra, si rivela un successu nicu, ma di stu mumentu l'attivitati musicali dâ cantanti s’arriduci cunzidirevurmenti, sia dû puntu di vista discugràficu, sia dû puntu di vista dî participazzioni televisivi, spissu nùtili e nun rilivanti.
Abberi la fini di l’anni Nuvanta arriggistra cû frati Gianni un paru di canzuni ca stèntanu a dicullari. Dinnanzi ê cuntìnui difficurtati di na discugrafìa ‘n mutamentu, la cantanti prifirisci didicàrisi â famigghia.
Ntô 2002, doppu aviri firmatu un novu cuntrattu cu la Sony Music, rializza un novu cd dûl tìtulu Passato e presente, nta cui rintèrprita ô megghiu parti dî successi stòrici, e àutri vecchi brani di lu sò ripirtoriu.
Pi zoccu riguarda li nèditi, lu primu sìngulu è l'irònica e abballabbilìssima Fa chic, scritta di Gianni e di Giancarlo Bigazzi, mentri La regina del silenzio, scritta di Gianni e Renato Zero avìa statu cantitata pi gariggiari a lu Festival di Sanremu 2002, unni Marcedda vinni bucciata pi l'ennèsima vota.
Ntô 2004 la cantanti partècipa ‘n vesti d’òspiti a lu Festival di Sanremu, direttu dd'annu di Tony Renis, nterpritannu dui granni clàssici dâ canzuna taliana comu "E se domani" di Mina e "Ancora" di Eduardo De Crescenzo. La sirata dî "vecchie glorie" si rivilau la cchiù siquita di dd'edizzioni. Ntô stissu annu si càntita a l’elezzioni europei cu Alleanza Nazionale a l’elezzioni europei, nun vinennu pirò eletta.
Ntô 2005 lu branu Uomo bastardo vidi lu ritornu di Marcedda di novu ‘n gara ô Festival di Sanremu. Nun ammàncanu li pulèmichi pi li scritti audaci ca rimànnanu ô tìtulu dû branu, cusuti direttamenti supra li vistiti (ntâ prima sirata ‘n particulari, la cantanti sfoggia la scritta "Uomo bastardo" supra lu funnuschina). Nunustanti chistu, Marcedda agghica ‘n finali nterpritannu lu branu cu la grinta e la passioni di li tèmpira megghi, addimustrannu d’aviri arristatu n’òttima cantanti e na bravìssima ntèrpriti, ô di ddà di certi testi ca nun sempri ci hannu rinnutu giustizzia.
L'omònimu cd cunteni armenu àutri dui brani chiuttostu vàlidi comu Medusa (scrittu di Mogol), e Tempo mio (cu testu di Pasquale Panella).
Ntô 2007 havi pigghiatu parti ô 57° Festival di Sanremu, cu un branu dû tìtulu Forever per sempre, cantatu ancora una vota ‘n cucchia cû frati e auturi dû pezzu, Gianni Bella. Duranti la sirata finali la canzuna havi arricivutu na vutazzioni particularmenti bascia di parti dâ c.d. giurìa di qualitati: li dui hannu dichiaratu d’aviri statu pinalizzati pi nun aviri mai ammucciatu la propia pusizzioni pulìtica.