Custu artìculu est iscritu in sa grafia campidanesa. Abbàida sas àteras bariedades gràficas:
logudoresu · LSC · nugoresu
Su terrorismu, in su sentidu prus mannu, est s'impreu de sa violèntzia po lompi a un'intentu ideològicu.
Su fueddu est impreau pruschetotu po inditai sa violèntzia fata cun intentzioni in tempus de paxi o in su cuntestu de sa gherra contra no-cumbatidoris[1]. Is fueddus "terrorista" e "terrorismu" funt nàscius in s'interis de sa rivolutzioni frantzesa a s'acabu de su sèculu XVIII[2] ma si funt spainaus a livellu internatzionali e ant gadangiau s'atentzioni mundiali me in is annus '70 in s'interis de su scòntriu de s'Irlanda de su Nord, su scòntriu bascu, e su scòntriu israelo-palestinesu. S'impreu sèmpiri prus mannu de atacus suitzidas incumentzendi de is annus '80 at agatau un'esempru famau cun is atacus de s'11 cabudanni 2001 me is Stadus Aunius.
Ddoi at definitzionis diferentis de terrorismu, chena acòrdiu universali apitzus de issas[3][4]. Su fueddu est de sòlitu impreau cun su sentidu negativu, de cosa "moralmente sballiada". Is guvernus e is grupus no statalis impreant su fueddu po abusai o denuntziai grupus opostus[4][5][6][7][8]. Organizatzionis polìticas vàrias funt stètias acusadas de impreai su terrorismu po portai a cumprimentu is obietivus insoru. Custas includint organizatzionis polìticas de dereta e de manca, grupus natzionalistas, grupus religiosus, rivolutzionàrius e guvernus[9]. Sa legislatzione chi decrarat su terrorismu unu crìmini est stètia adotada in stadus medas[10]. Candu su terrorismu benit de stadus natzionalis, su stadu chi ddu portat ainnantis no ddu cunsiderat terrorismu, faendi sa chistioni de sa legalidai pagu crara[11]. No ddoi at cunsensu apitzus de su fatu chi su terrorismu depat essi cunsiderau unu crìmini de gherra[12][13].
Sa Basi de datus globali de su terrorismu, manigiau de s'Universidadi de su Maryland, College Park, at arregistrau prus de 61.000 acuntessimentus de terrorismu no statali, cun assumancu 140.000 mortus, intra su 2000 e su 2014[14].
↑ 4.04.1(EN) Robert Mackey, Can Soldiers Be Victims of Terrorism?, in The Lede, 20 santandria 2009. URL consultadu su 5 martzu 2022. «Terrorism is the deliberate killing of innocent people, at random, in order to spread fear through a whole population and force the hand of its political leaders.».
↑(EN) Global Terrorism Index 2015 (PDF), in economicsandpeace.org. URL consultadu su 5 martzu 2022 (archiviadu dae s'url originale su 7 freàrgiu 2019).