Fecha di fundashon òf kreashon | 1925 |
---|---|
Deporte | futbòl |
Pais | Kòrsou |
Liga | Liga Kòrsou |
Akomodashon | Stadion dr. Antoine Maduro |
Sede | Willemstad |
Wèpsait ofisial | http://www.subt.cw/index.php/nl/ |
SUBT, abreviashon di Sport Unie Brion Trappers, ta un klup di futbòl di Willemstad, Kòrsou. E klup ta hunga den Liga Kòrsou i tabata pa hopi aña un di e klupnan mas destaká di e isla. E ekipo di SUBT, tambe konosí komo "barikahel", a titulá kampeon di Kòrsou i ganadó di Kopa antiano na varios okashon.
Dia 17 di sèptèmber 1925 un grupo di hoben na Kòrsou, dirigi pa Antoine Maduro, Ricardo Goeloe i Emilio Jansen, ta lanta CSC Trappers.[1] E promé presidente tabata Ricardo Goeloe. Dia 15 di mei 1936 CVV Bismarck i CSC Trappers ta uni bou di e nòmber Sport Unie Bismarck-Trappers (SUBT) i na 1939 e klup di futbòl Feyenoord tambe ta djòin.[2] Na 1942, durante Guera Mundial II, ta kambia e nòmber pa Sport Unie Brion-Trappers komo ku e referensia na Bismarck tabata indeseabel.
Na 1938 e ekipo ta titulá pa promé bes kampeon di e torneo di Federashon Futbòl Kòrsou. E tabata kampeon di Kòrsou na 20 okashon i ganadó di e Kopa antiano na seis okashon.[2]
Desde 2008 Ebell Scharbaai ta presidente di e klup. Entrenadó ta Reynolds Mercera.
SUBT ta atkerí su propio velt na 1948, konosí komo vèlt di SUBT of stadion di Kintjan. Organisando varios rifa den kurso di tempu, e klup por a genera entrada pa entre otro konstruí i mantene un stadion. Na 1985 e stadion a wòrdu dediká na Antoine Maduro, kende tabata e hungadó mas remarkabel di SUBT fuera di ser ko-fundadó i un di su promé presidentenan.[3] Stadion dr. Antoine Maduro tin aktualmente un kapasidat pa 7000 persona i ta situá na Willemstad, den bario di Vredenberg serka di Kintjan.[1]
Kopa Wilhelmina: 3
Kopa Juliana: 6
Kopa antiano: 6
Sekshon Pagá: 20
Referensia
|