No wala ray makadngel na sayan ngaran na lugar,mankelaw ira tan maniimis.Saksakey iyan barangay ed Syudad na Dagupan a nauulit so ngaran o pamitla na saray pantig na letra saniba, singa saya, MA-MA-LING-LING. Ag narumog so tuan nanlapuan o panon ya limmesa so sayan ngaran. Say kuanto imay sankatakkenan ed Barangay Mamalingling a mangaran na Esperanza Villon a mantaon na 87, sayan ngaran na barangay so abangonan dala a ngaran to. Agto naibaga no antoy peteg a nanlapuan na ngaran na Mamalingling. Onung ed inpansukimat kod Dagupan City Library, angapoy konreton tan malaknab a pakarumugan na say istoria o senge-sengeg a pakalmuan na reperensia. Sayan lugar et datin parti na Barangay Bolosan a tinawag ya sitio Mamalingling.