Un clima desertic es un clima associat a de precipitacions fòrça febla, a una amplitud termica jornadiera e anuala fòrta, a de temperaturas generalament extrèmas e a d'estius cauds ò fòrça cauds. Dins la classificacion de Köppen, n'existís dos tipes principaus : lo clima desertic caud (BWh) que s'obsèrva dins lei desèrts cauds coma Sahara e lo clima desertic freg (BWk) qu'es frequent dins lei desèrts continentaus de l'interior d'Asia.
Lo clima desertic caud (BWh) se tròba dins de regions subtropicalas, especialament entre lei latituds 20° e 33°. D'efiech, aqueleis endrechs son lo luòc de recepcion de corrents d'aire atmosferic importants qu'entraïnan la formacion de zònas de pression auta. Coma aquelei corrents son fòrça estables, i empachan la formacion de nívols e donc de precipitacions durant de periòdes lòngs. L'ensorelhament i es fòrça important, çò que favoriza de temperaturas importantas e una ariditat extrèma.
Ansin, durant la sason cauda, lei temperaturas mejanas se situan generalament entre 29 e 35 °C mai de valors superioras a 40 °C son frequentas. Lo recòrd actuau es de 56,7 °C mesurat dins la Vau de la Mòrt en America dau Nòrd. Durant la sason freja, lei temperaturas pòdon demorar superioras a 30 °C. Aquelei condicions engendran la formacion de desèrts eissuchs amb de precipitacions inferioras a 200 mm/an en America e en Austràlia, a 100 mm/an en Asia Centrala e dins la Peninsula Aràbia e a 50 mm/an en la màger part de Sahara. De mai, l'aiga dei precipitacions subís un procès rapid d'evaporacion.
En consequéncia, lei regions de clima desertic caud son associats amb de desèrts. La vegetacion i es rara mai sa preséncia es possibla a l'entorn de rius ò de fònts (oasís). Es generalament constituïda d'espècias ben adaptadas a l'ariditat (paumiers, cactus, etc.).
Lo clima desertic freg (BWk) es un clima generalament dins lei regions temperadas que son privats de precipitacions per la preséncia de montanhas importantas. Per aquela rason, lei desèrts fregs son mai que mai situats dins leis Andes e en Asia Centrala. Pasmens, lo tèrme « freg » empacha pas lei temperaturas de passar 30 °C durant l'estiu. Dins aquò, leis ivèrns son fregs e, durant la sason cauda, de vent fregs pòdon tanben entraïnar una demenicion marcada de la temperatura. Lei precipitacions son raras tota l'annada e l'endrech pus arid de la planeta, lo Desèrt d'Atacama, es una region de clima desertic freg. Lei precipitacions ivernencas pòdon tombar sota forma de nèu. Coma dins lei desèrts cauds, la vegetacion es pauc desvolopada. Pasmens, en preséncia d'aiga, son desvolopament es sovent pus aisat.
Lo clima desertic doç (BWn) es un clima desertic rar presents dins de regions d'altitud tropicalas ò subtropicalas. Correspònd a un clima desertic caud moderat per l'efiech de l'altitud. Dins lei zònas litoralas, aquò favoriza la formacion de nívols bas e de nebla que pòdon portar una certana umiditat dins la region.