Abu Sufyan ibn Harb († sègle VII) es un cap tribau de La Mèca durant la premiera mitat dau sègle VII. Eissit dau clan omeia de la tribü Qurays, s'opausèt rapidament a Maomet e ai premiers musulmans que menaçavan leis avantatges militars e economics de la tribü. Dins lo corrent deis ans 620, foguèt un dei caps militars de la vila durant la guèrra entre La Mèca e Maomet. Pasmens, a partir de 628, Abu Sufyan ibn Harb acceptèt de negociar amb Maomet. En cambi de plusors concessions importantas destinadas a mantenir la posicion economica dei Qurays, la tribü se convertiguèt pauc a pauc entre 628 e 630.
Maomet esposèt una filha d'Abu Sufyan ibn Harb e lo cap omeia demorèt fidèu au Profèta fins a sa mòrt. Foguèt grèvament bleçat a la batalha de Yarmuk en 636. Lo rèsta de son clan l'imitèt e l'influéncia omeia aumentèt rapidament au sen de l'elèit militar arabi. Lo tresen califa, Othman ibn Affan, èra ansin un Omeia e lo fiu d'Abu Sufyan ibn Harb, Muawiya, prenguèt lo poder en 661 e fondèt lo Califat Omeia.