Torgeir Vraa | |||
![]() | |||
Fødd | 16. mai 1868 Fyresdal komune | ||
---|---|---|---|
Død | 21. juni 1934 (66 år) | ||
Statsborgar av | Noreg | ||
Parti | Venstre (ukjend; 1897), Arbeidarpartiet (1897; ukjend) | ||
Yrke | politikar, journalist, redaktør | ||
Alle verv |
|
Torgeir Olavsson Vraa (16. mai 1868–21. juni 1934) var ein norsk pressemann og politikar frå Fyresdal. Han var fyrst medlem av Venstre, frå 1897 representerte han Arbeidarpartiet.
Vraa var son til ein gardbrukar på Rui i Fyresdal. Han gjekk Asker seminar og var ferdig seminarist i 1889. Åra 1890-1904 var han lærar i Modum, samstundes som han var gardbrukar på garden kona hans kom i frå. Frå 1902 var han journalist i Social-Demokraten. I 1905 vart han den fyrste redaktøren i den ferske avisa Fremtiden i Drammen, busett i byen der. Han redigerte avisa heilt fram til han døydde.
Vraa var stortingsrepresentant for Arbeidarpartiet periodane 1906-09, 1925-27 og 1931-33. I sin fyrste periode var han vald frå einmannskrinsen Strømsø og Tangen, dei to siste gongane frå kjøpstadene i Buskerud (Drammen, Hønefoss, Kongsberg). Han var 1906-09 medlem av protokollkomiteen, på dei seinare stortinga var han medlem av skog- og vassdragskomiteen. Vraa var kjend som ein framifrå agitator, og reiste vidt og breitt i Noreg på talarferd for Arbeidarpartiet.
Han var også lokalpolitikar, medlem av heradsstyret i Modum og var varaordførar i Drammen bystyre mellom 1910 og 1913, samt medlem av formannskapet i til saman fire valperiodar mellom 1913 til 1928. Han var elles formann i Buskerud Arbeidarparti, samt landsstyremedlem av Det Norske Arbeidarparti 1904-12 og 1918-20.
Vraa døydde i Drammen i 1934. Ein statue av han vart reist i byen to år etter.