Toralf Westermoen | |
![]() | |
Statsborgarskap | Noreg |
Fødd | 5. juli 1914 Landvik kommune |
Død | |
Yrke | politikar, ingeniør |
Språk | norsk |
Politisk parti | Kristeleg Folkeparti |
Toralf Westermoen på Commons |
Toralf Westermoen (5. juli 1914–6. mai 1986) var ein norsk industrileiar og stortingsrepresentant for Kristeleg Folkeparti, fødd i Landvik i Aust-Agder. Gjennom sitt leiarskap i verftsnæringa i Vest-Agder var han ein sentral aktør i utviklinga av og bygginga av hurtigbåtar i Noreg.
Westermoen var son til ein gardbrukar og båtbyggjar. I yngre år tok han del i båtbyggjarverksemda, og gjekk handelsskule. Han starta i 1948 opp A/S Westermoen Båtbyggeri og Mek. Verksted i Mandal, og var direktør i firmaet til 1961, deretter administrerande direktør ved Westermoen Hydrofoil A/S til 1971 og til sist i selskapet Westamarin, også desse heimehøyrande i Mandal.
Westermoen Båtbyggeri byrja utvikle ein snøggåande motortorpedobåt tidleg i 1950-åra. Det resulterte i konstruksjonen «Nasty», grunnlaget for den såkalla Tjeld-klassen av motortorpedobåtar. I tida 1957-71 vart bygt 42 båtar i denne klassen, båtar med ei toppfart på i kring 45 knop. Halvparten av Tjeld-båtane vart eksportert til Tyskland, Tyrkia, Hellas og USA.
Westermoen gav så Harald Henriksen i oppdrag i å utvikle ein ny hurtigbåt med katamaranskrog. Han utvikla den såkalla westamaranen, ein båt men plass til fleire passasjerar og med enklare vedlikehald enn hydfrofoilbåten. Verksemda A/S Westermoen Båtbyggeri og Mek. Verksted er i dag vidareført gjennom selskapet Umoe Mandal.
Westermoen var medlem i Mandal bystyre i åra 1956-63. Frå 1969 til 1981 møtte han på Stortinget frå Vest-Agder, vald for Kristeleg Folkeparti. Fram til 1979 var han medlem i Industrikomiteen, dei to siste sesjonane sat han i Forsvarskomiteen. Lokalt hadde han ei rad styre- og tillitsverv både i næringslivet, samfunnsstyringa og i kristelege lag.