Lise Karlsnes | |||
![]() | |||
Fødd | 27. november 1979 (44 år) | ||
---|---|---|---|
Fødestad | Tønsberg | ||
Opphav | Noreg | ||
Aktiv | 1999– | ||
Sjanger | pop, elektropop | ||
Instrument | vokal | ||
Verka som | songar |
Lise Karlsnes (fødd 27. november 1979 i Tønsberg) er ein norsk musikar kjend som vokalist i gruppa Briskeby. Ho har òg hatt ein solokarriere.[1]
Karlsnes vart med i Briskeby i 1999 og fekk sitt store gjennombrot året etter med songen «Propaganda».[2] Gruppa vart tildelt fire prisar under Spellemannprisen 2000. Dei vart oppløyst i 2005, men gjenforeint i 2015. Suksessen dei hadde i 2000-åra uteblei likevel.[3]
I 2010 gav ho ut sin fyrste solosingel; «Forty Nights», under namnet «Lise Of The Woods». I 2012 deltok ho i Melodi Grand Prix med låten «Sailors» som ho hadde skrive saman med Thomas Eriksen. «Sailors» vart utgjeven på albumet Dance or Die i 2012. Albumet vart produsert av Thomas Eriksen. Sidan den gongen har ho hatt nokre små opptredenar med andre artistar, men det har generelt vore lite musikkproduksjon.[2]
I 2007 designa ho sin eigen kolleksjon med 70-talsinspirerte solbriller i samarbeid med Krogh optikk på Majorstua.[4][5] I 2010 gjekk ho på catwalken under Oslo Fashion Week.[2]
I 2016 hadde ho ei birolle i filmen Børning 2, i 2018 deltok ho i sceneshowet Beatles på Chat Noir og i 2020 var ho deltakar i realityserien Kompani Lauritzen.[6]
I 2017 starta ho å studera psykologi og har som uttalt mål å jobba med gestaltterapi.[2]